قوباد تاڵەبانی بەردی بناغەی پردی تەنگی سەید محەمەد لە هەڵەبجە دادەنێت

نوسینگەی راگەیاندنی جێگری سەرۆکوەزیران

دانانی بەردی بناغەی پردی تەنگی سەید محەمەد

لە میانەی سەردانێکیدا بۆ پارێزگای هەڵەبجە، قوباد تاڵەبانی، جێگری سەرۆکوەزیران بە یاوەری دانا عەبدولکەریم، وەزیری ئاوەدانکردنەوە و نیشتەجێکردن بەردی بناغەی پردی تەنگی سەید محەمەدی دانا.

پردی تەنگی سەید محەمەد پڕۆژەیەکی ستراتیژییە لە ناوچەکەدا و پارێزگای هەڵەبجە و ئیدارەی گەرمیان پێکەوە دەبەستێتەوە، درێژی پردەکە ٦٠٠ مەتر دەبێت و بە گوژمەی نزیکەی ٢٧ ملیارد دینار لەماوەی ٩٠٠ رۆژدا جێبەجێ دەکرێت.

هەر لە سەردانەکەیدا بۆ پارێزگای هەڵەبجە، قوباد تاڵەبانی پڕۆژەی سایلۆی هەڵەبجەی بەسەر کردەوە و بە دواداچوونی کرد بۆ چۆنییەتی بەرەوپێشچوونی کارەکانی پڕۆژەکە، کە یەکێکە لە پرۆژە ستراتیژییەکانی پارێزگاکە و لە ساڵی ٢٠٢٤دا بەردی بناغەکەی دانراوە و لە ماوەی دوو ساڵدا تەواو دەکرێت.

 لەلایەکی دیکەوە، دانا عەبدولکەریم وەزیری ئاوەدانکردنەوە و نیشتەجێکردن وتارێکی لەبارەی پرۆژە خزمەتگوزارییەکانی هەڵەبجە پێشکەشکرد و رایگەیاند:" سبەینێ ساڵیادی کیمیابارانکردنی هەڵەبجەیە، لێرەوە سەری رێز و نەوازش بۆ شەهیدان دادەنەوێنم و هیوادارم زیاتر خزمەتی خەڵکی ئەم شارە قوربانیدەرە بکەین".

ئاماژەی بەوەشکرد:" ئەم پرۆژەیە یەکێکە لەداواکارییەکانی دانیشتوانی هەڵەبجە و رێگایەکی دیکە بەڕووی هاووڵاتیاندا دەکاتەوە، ئومێدەوارم لەم دۆخە داراییەدا بتوانین خزمەتی زیاتری هەڵەبجە بکەین".


PUKMEDIA