قوباد تاڵەبانی: كەركوكییەكان خۆیان گەورەترین پارێزەرن

نووسینگەی قوباد تاڵەبانی

قوباد تاڵەبانی جێگری سەرۆكوەزیرانی هەرێم

قوباد تاڵەبانی رایدەگەیەنێت: "كەركوكییەكان خۆیان گەورەترین پارێزەرن و شەپۆلی گەڕانەوەیان بۆ بەشداری لەپڕۆسەی سەرژمێری سەلماندی كە كەركوك بۆ هەمیشە وەك شارێكی كوردستانی دەمێنێتەوە"

قوباد تاڵەبانی جێگری سەرۆكوەزیرانی هەرێم، لەبارەی پڕۆسەی سەرژمێرییەوە پەیامێكی بڵاوكردەوەو رایگەیاند: "كەركوكی بوون شانازییەو پەرۆشی و شەپۆلی گەڕانەوەی كەركوكییەكان بۆ بەشداری لە پڕۆسەی سەرژمێریدا جارێكیتر بۆ هەموو لایەكی سەلماند كە كەركوك بۆ هەمیشە وەك شارێكی كوردستانی و سیمبولی پێكەوەژیانی ئاشتییانە دەمێنێتەوە".

راشیگەیاند: "كەركوكییەكان خۆیان گەورەترین پارێزەرن".

هاوكات قوباد تاڵەبانی جێگری سەرۆكوەزیرانی هەرێم لە دیدارێكیدا هەر ئەمڕۆ لەگەڵ ئەندامانی فراكسیۆنەكانی یەكێتی و بابلیون لەئەنجومەنی پارێزگای كەركوك داوای لێكردن لەسەر رێبازی مام جەلال، بە هەموو تواناوە و بەبێ هیچ جیاوازییەك خزمەتی كەركوك بكەن. دەبێت فراكسیۆنەكانی یەكێتی و بابلیون زیاتر و باشتر لە فراكسیۆنەكانی تر چاودێربن بەسەر كارەكانی ئیدارەی نوێی كەركوكەوە.

جەختیشیكردەوە كە دەبێت بە شێوەیەك خزمەتی خەڵكی كەركوك بكەن، رۆژ لە دوای رۆژ زیاتر ئاستی هیوا و متمانەی كەركوكییەكان بە هەموو پێكهاتەكانییەوە بە پارێزگار و فراكسیۆنەكانی یەكێتی و بابلیون بەرزتر ببێتەوە.

ئەمەش لەكاتێكدایە ئەمڕۆ 20-11-2024، قوباد تاڵەبانی جێگری سەرۆكوەزیرانی هەرێم، لە كەركوك بەشداری پڕۆسەی سەرژمێری گشتی له‌ عیراق كردو خۆی تۆمار كرد.

دوای نزیکەی 40 ساڵ، سەرلەبەیانی ئەمڕۆ 2024-11-20 پرۆسەی سه‌رژمێری گشتی له‌ عیراق و هه‌رێمی كوردستان دەستیپێکرد و سبەینێش پرۆسەکە بەردەوام دەبێت، بۆ ئەو مەبەستەش قەدەغەی هاتووچۆ لەسەرجەم ناوچەکانی عیراق و هەرێم تا سەعات 12:00 شەوی 21 لەسەر 22ی11  راگەیەنراوە و پێویستە هاووڵاتیان لەکاتی سەردانیکردنی بژمێرەکان بۆ ماڵەکانیان ئامادەییان هەبێت و وەڵامی پرسیارەکانیان بدەنەوە.

PUKMEDIA