دادگای فیدراڵی سكاڵاكانی سەر پارێزگاری كەركوك رەتدەكاتەوە

PUKMEDIA

باڵەخانەی دادگای فیدراڵی

دادگای باڵای فیدراڵی عیراق پێنج سكاڵای عەرەب و توركمانی لەسەر پارێزگارو ئەنجومەنی پارێزگای كەركوك رەتكردەوە.

بەپێی كارنامەی دانیشتنی دادگای باڵای فیدراڵی عیراق، ئەمڕۆ دادگاكە هەر پێنج سكاڵاكەی كەلەلایەن راكان جبوری و حەسەن تۆران و سەوسەن عەبدولواحیدەوە تۆماركراون، رەتكردەوە كەلەسەر دانیشتنی ئەنجومەنی پارێزگای كەركوك لە هۆتێل رەشید بۆ هەڵبژاردنی پارێزگارو پێكهێنانی ئەنجومەنی پارێزگای كەركوك تۆماریان كردبوو.

هاوكات دوو سكاڵاشیان لەسەر هەڵوەشاندنەوەی مەرسومی كۆماری ژمارە 83 ی 13-8-2024، تایبەت بە دانانی رێبوار تەها بە پارێزگاری كەركوك تۆماریان كردبوو.

ئەمەش لەكاتێكدایە ئەنجومەنی پارێزگای كەركوك لە 13 ئەندام پێكهاتووەو كوردو عەرەب و توركمان و مەسیحی تێیدا بەشدارن.

رۆژی  10ـی 8ـی 2024، لەهۆتێل رەشید لەبەغدا، كۆبوونەوەی ئەنجومەنی پارێزگای كەركوك بەڕێوەچوو، تێیدا رێبوار تەها سەرۆكی هاوپەیمانی كەركوك هێز و ئیرادەمانە لەپشكی كورد وەك پارێزگاری كەركوك هەڵبژێردرا، هەروەها محەمەد حافز لەپشكی عەرەب بە سەرۆكی ئەنجوومەنی پارێزگای كەركوك هەڵبژێردرا.

PUKMEDIA‎