سەرۆككۆمار: روبەڕوبوونەوەی ئاڵنگارییەكان یەكڕیزی لایەنەكانی دەوێت

نووسینگەی سەرۆككۆماری عیراق

پێشوازی سەرۆككۆمار لە سكرتێری كۆمیتەی ناوەندیی حزبی شیوعی عیراق

د.لەتیف جەمال رەشید سەرۆككۆماری عیراق پێشوازی لە رائد فەهمی سكرتێری كۆمیتەی ناوەندیی حزبی شیوعی عیراق كرد.

لەدیدارێكدا كە رۆژی 11-3-2024 لە كۆشكی سەلام لە بەغداد بەڕێوەچوو، سەرۆككۆمار پیرۆزبایی لە سكرتێری كۆمیتەی ناوەندیی حزبی شیوعی عیراق كرد بەبۆنەی یادی 90 ساڵەی دامەزراندنی حزبەكەیان، هەروەها هیوای سەركەوتن و بەردەوامی لە خەبات بۆ سەركردە و جەماوەری حزبەكەش خواست.  

سەرۆككۆمار جەختیكردەوە لە گرنگی چەسپاندنی ئاسایش و سەقامگیری لە وڵات و بەدیهێنانی دادپەروەریی كۆمەڵایەتی و چاودێریكردنی هەنگاوەكانی پەرەپێدان و چاكسازیی ئابوری و بەدیهێنانی خواستەكانی هاووڵاتیان.

سەرۆككۆمار ئاماژەی بەوەشكرد:" ئەم قۆناغە پێویستی بە یەكڕیزی زیاتری هەموو لایەنە سیاسییەكان هەیە بۆ روبەڕوبوونەوەی ئاڵنگارییەكان و بە ئەنجامگەیاندنی شایستە دەستوری و نیشتمانییەكان".

لە لای خۆیەوە رائد فەهمی جەختی لە بایەخی چەسپاندنی بنەما نەگۆڕە نیشتمانییەكان كردەوە بۆ بەردەوامبوون لە بونیادنان و پێشكەوتن، بەشێوەیەك كە خزمەت بە بەرژەوەندییەكانی هاووڵاتیان بكات. هەروەها پێویستی هاریكاری و هاوئاهەنگی و پێكەوەژیانی راستەقینەی لەنێوان رۆڵەكانی وڵاتدا دوپاتكردەوە.
‏
PUKMEDIA