ئاسۆ مامەند بۆ گەنجانی كەركوك: دەنگەكانتان ئایندەمان دیاريی دەكەن

PUKMEDIA

ئاسۆ مامەند سەرۆكی قەوارەی هاوپەیمانی كەركوك هێز و ئیرادەمانە

ئاسۆ مامەند سەرۆكی قەوارەی هاوپەیمانی كەركوك هێز و ئیرادەمانە، پەیامێك ئاڕاستەی گەنجانی كەركوك دەكات و رایدەگەیەنێت: "دەنگتان یەكلایكەرەوە دەبێت لەسەر هەڵبژاردنی ئەنجومەنی پارێزگا كە بە دەنگی ئازا و ئازادیان دەیسەلمێنن جێی ئومێدی سەرجەم چین و توێژەكانن و بە پەنجەمۆری خۆیان دواڕۆژی هەموومان دیاری دەكەن".

دەقی پەیامەكە:

پەیامی هەڤاڵ ئاسۆ مامەند سەرۆكی قەوارەی هاوپەیمانی كەركوك هێز و ئیرادەمانە بۆ گەنجانی كەركوك  

-كچان و كوڕانی نەبەز و ئازای كەركوك
-لاوانی دواڕۆژی وڵاتەكەمان
 
بە سڵاوێكی گەنجانەی گەرمەوە، پەیامی دیموكراسی و ئازادیتان پێشكەش بێت، بە تایبەتی بۆ گەنجان و لاوانی تازە هەڵكەوتووی شارەكەمان كە ئەم هەڵبژاردنە بۆ یەكەم جار مافی خۆیان لە دەنگدان بەكار دەهێنن، بۆ یەكەمین جاریش ئەركی سەرشانیان لە دیاریكردنی ئیدارە و حوكمڕانی خۆماڵی جێبەجێ  دەكەن.

ئێمە هیوایەكی زۆرمان بە كچان و كوڕانی كەركوك، بە دەنگدەرانی هوشیار و تێگەیشتووی شارەكەمان هەیە كە دەنگیان یەكلایكەرەوە دەبێ لەسەر هەڵبژاردنی ئەنجومەنی پارێزگا كە بە دەنگی ئازا و ئازادیان دەیسەلمێنن جێی ئومێدی سەرجەم چین و توێژەكانن و بە پەنجەمۆری خۆیان دواڕۆژی هەموومان دیاری دەكەن.

كچان و كوڕانی دیموكراسی و هەڵبژاردن، بە خۆشحاڵییەكی زۆرەوە لە كەمپینی هەڵبژاردنی ئەم جارەدا دەرفەتی زێڕینمان بۆ ڕەخسا كە پێكەوە زۆرترین دیدار و دیالۆگمان هەبێت لەگەڵ ئێوەی خۆشەویستدا.  ئێمە لە چاوی ئومێدی گەنجان و لە گفتوگۆی پڕسوودی ئێوەوە زۆر ڕاستیمان بۆ دەركەوت لە سەر دۆخی شارەكەمان،  لەسەر هیوا و ئاواتی گەنجانەتان بۆ خزمەت و پێشخستنی كۆمەڵگاكەمان.. زۆر ئاخ و حەسرەت و پێشنیارمان بینی و گوێمان لێ بوو، لەسەر دابینكردنی هەلی كار و لەسەر دەرفەتی پێشخستنی توانای گەنجان لە بازاڕ و لە دامەزراندن، لە پەرەپێدانی توانا و بەهرەكانتان كە بێگومان بۆ ئێمە ڕێنوێنی و قیبلەنما دەبێت بۆ كاری داهاتوومان لە ئیدارە و حكومڕانی كەركوك و  لە ئۆرگانەكانی حزب و حكومەت و هەموو بوارەكانی ژیان لە وڵاتەكەماندا .هەروەها لەو كۆمەڵ و ڕێكخراوانەی وزە و بەهرەی لاوان و خوێندكاران لە كایەی وەرزش و هونەر و داهێنان دەگەشێنەوە.

 بە شانازییەوە ئێمە ئەو بیروڕا و پێشنیاز و داخوازییانەی ئێوەمان كردووەتە بەرنامەی كاری قەوارەی هاوپەیمانی كەركوك هێز و ئیرادەمانە و لیستی ١٤٢.. بەنیازیشین  لە دوای ئاهەنگی سەركەوتن لە (١٨-١٢-٢٠٢٣)
دەست بەجێبەجێكردنی بكەین .
گەنجانی دلێر و بە توانا
ئێمە دەنگی زێڕینی گەنجان بە خەزینی گەورەی دیموكراسی و ئازادی دەزانین كە  لە حوكمڕانی داهاتووی كەركوكدا دەنگمان دلێرتر دەكات بۆ جێبەجێكردنی ویست و داخوازییەكانتان

ئێمە وزەی گەنجانمان لە چەندین وێستگەدا تاقی كردۆتەوە. گەنجانی كوردستان و بە تایبەتیش گەنجانی كەركوك داینەمۆی شۆڕشی نوێی گەلەكەمان بوون ، بگرە شۆڕشی یەكێتی نیشتمانی كوردستان بە سەرۆكایەتی سەرۆك مام جەلال شۆڕشی گەنجان بوو بەرامبەر ستەمی بەعس و تەعریب و زوڵم و زۆری سیاسی دژی گەلەكەمان. هەر بە وزەی گەنجانیش سەركەوتین . خوێندكاران و لاوان لە خەباتدا پێشمەرگەی ڕزگاری بوون و لەدوای ڕزگاریشەوە پێشمەرگەی ئاوەدانی و بونیاتنان بوون،  بۆ لەمەو دواش هەر، وا دەبن بەڵام ئەمجارەیان بۆ ئەركێكی تازە كە ئەركی ئازادی و دیموكراسییە،  ئەركی سەرخستنی لیستی ١٤٢ كە ئیرادە و هێزی لەمەودوای كەركوكییەكان  دەردەخات .

ئێوە بە دەنگی خۆتان ئایندەی خۆتان و ئێمەش دیاری دەكەن، دەسا دەنگدانتان بكەنە قەڵغانی پاراستنی كوردستانێتی كەركوك، بیكەنە قەڵای ئومێد و هیوا بۆ دواڕۆژی كەركووكێكی گەنج كە لاوان  لە سایەیدا هەلی كار و هەلی ژیان و هەلی پێكەوەنانی خێزان و پێشخستنی كۆمەڵگەیان بۆ بڕەخسێت.

با حكومەتی داهاتووی كەركوك حكومەتی گەنجان،  حكومەتی بەدیهێنانی ویست و ئیرادەی گەنجان بێت.
پەنجەمۆری ئێوە شایەتی لەسەر داهاتوو دەدات.
بۆ پێشەوە بەرەو سندوقەكانی دەنگدان
دیدار و دیالۆگی ماوەی كەمپینی هەڵبژاردنتان بە خێر و دیدار و دیالۆگی داهاتووشمان بە خێر بێت.

براتان
ئاسۆ مامەند
 سەرۆكی قەوارەی هاوپەیمانی كەركوك هێز و ئیرادەمانە

PUKMEDIAٍٍ