سەرۆکی هاوپەیمانی کەرکوک هێزو ئیرادەمانە ناڕەزایەتییەکانی کورد دەگەیەنێتە یۆنامی

تایبەت

کۆبوونەوەی رێبوار تەها لەگەڵ وەفدێکی یۆنامی

رۆژی پێنج شەممە ٢-١١-٢٠٢٣  ڕێبوار تەها سەرۆکی لیستی ١٤٢ی هاوپەیمانیی کەرکوک هێز و ئیرادەمانە لە بارەگای مەکتەبی سیاسی لە شاری کەکوک، پێشوازیی لە وەفدێکی یۆنامی کرد بە سەرۆکایەتیی پیپە لۆڤۆی بەڕێوەبەری نوسینگەی یۆنامی لە کەرکوک.


لە دیدارەکەدا رێبوار تەها سەرۆکی لیستی ١٤٢ی هاوپەیمانیی کەرکوک هێز و ئیرادەمانە، بە تێر و تەسەلی دۆخی سیاسی، ئیداری، ئەمنی و پڕۆسەی هەڵبژاردنی ئەنجومەنی پارێزگای کەرکوکی لەگەڵ وەفدی یۆنامی باسکرد، و وتی؛ یەکێتی لە سۆنگەی پەرۆشییەوە بۆ پێشخستنی پڕۆسەی دیمۆکراسی ئامانجێتیی هەڵبژاردنێکی پاک و بێگەرد لە کەرکوک بەڕێوەبچێت.


لسەرۆکی لیستی ١٤٢ی هاوپەیمانیی کەرکوک، بە بەڵگەو ژمارە، ئەو نادادی و پێشێلکارییانەی کە بەرامبەر بە نەتەوەی کورد دەکرێن لە پارێزگاکە بە وەفدی یۆنامی راگەیاند، هەر لە پەڕاوێزخستنی کورد لە بەڕێوەبردنی پارێزگاکەو بێبەشکردنی گەڕەک و ناوچە کوردییەکان لە پڕۆژە خزمەتگوزارییەکان و دانەمەزراندنی کورد لە فەرمانگە و دامەزراوەکانی کەرکوک بە شێوەیەک کە شایستە بێت بە ژمارە و قەبارەی کورد لەو پارێزگایە.


لە بەرامبەردا وەفدی یۆنامی خۆشحاڵی خۆیان بەو دیدارە دەربڕی و رایانگەیاند؛ "کەرکوک بە هۆی فرەییەوە، دۆخێکی تایبەتیی هەیە و دەبێت ئەو بابەتە لە سەرجەم سێکتەرەکاندا لەبەرچاو بگیرێت، راشیانگەیاند؛ نابێت هیچ پێکهاتەیەک لە بەڕێوەبردنی پارێزگاکەدا پەڕاوێز بخرێت".

PUKMEDIA