رەفعەت عەبدوڵڵا: هەنگاوەکانی رێکخستنەوەی ئۆرگانەکانی یەکێتی جێگەی ستایشە

تایبەت

سەردانی رەفعەت عەبدوڵڵا بۆ مەکتەبی ناوەندەکانی دەرەوەی یەکێتی

بڕیاردەری دەستەی کارگێری مەکتەبی سیاسی یەکێتیی نیشتمانیی کوردستان رایگەیاند، "پشتیوانی لەهەنگاوەکانی مەکتەبی ناوەندەکانی دەرەوە دەکەن بۆ رێکخستنەوە و گەشەپێدانی ئۆرگانەکانی یەکێتی لەدەرەوەی وڵات".

 رۆژی پێنج شەممە 18ی 5ی 2023، رەفعەت عەبدوڵڵا بڕیاردەری دەستەی کارگێڕی مەکتەبی سیاسی  یەکێتیی نیشتمانیی کوردستان لەکۆبوونەوەیەکیدا لەگەڵ پۆڵا سیروان تاڵەبانی لێپرسراوی مەکتەب و ئەندامانی مەکتەبی ناوەندەکانی دەرەوە ستایشی کاروچالاکیەکانی مەکتەبەکەی کرد کە لەماوەی رابردوودا بەوپەڕی لێبوردەییەوە ناویانە لەپێناو گەشەپێدانی ریزەکانی یەکێتی.

تەوەرێکی تری کۆبوونەوەکە پەیوەندی نوێنەرایەتیەکانی هەرێم و پشتیوانی و هاندانی ناوەندی دەرەوە بۆ بینینی رۆڵی گەورەترلە گەشەپێدانی دۆزی رەوای گەلەکەمان لە ئاستی نێودەوڵەتیدا بوو.

 بڕیاردەری دەستەی کارگێڕی مەکتەبی سیاسی بەوردی بارودۆخی سیاسی هەرێمی کوردستان و پەیوەندییەکانی لەگەڵ عیراقی فیدراڵ و کاراکردنەوەی بەشداری لە حکومەتی هەرێم و پتەوکردنی پەیوەندیەکان لەگەڵ لایەنە کوردستانیەکان خستەڕوو و لەوبارەیەوە داوای لە هەڤاڵانی ناوەندەکانی دەرەوە کرد ئەوانیش لە ناو کارکردنی ئۆرگانەکانی یەکێتیدا تەئکید لەسەر ئەو هەماهەنگیانە بکەنەوە.

 پاشان لێپرسراوی مەکتەبی ناوەندەکانی دەرەوە و هەڤاڵانی ئەندام مەکتەب چەندین سەرنج و تێبینی وپێشنیار لەسەر نەخشە و پلانی ئایندەی کارکردنی ناوەندەکانی دەرەوە خستەڕوو، و پرس و رایان لەبارەوە ئاڵوگۆر کرا.
PUKMEDIA