پارتی دوو ساڵ (هێرش)ی بەناهەق زیندانیکرد و ئازادکرا

راگەیاندنی مەڵبەندی سۆران

ئازادبوونی هێرش نەجم مەرعان

دوای زیاتر لە دوو ساڵ بە ناحەق دەستگیرکردن و زیندانیکردنی لە لایەن هێزە ئەمنییەکانی پارتی، رۆژی ٣-٤-٢٠٢٣، (هێرش نەجم مەرعان) کادری یەکێتیی نیشتمانیی کوردستان بە شکۆمەندی و ئیرادەیەکی بەرزەوە، دوای ئازادبوونی لە زیندانەکانی پارتی بەسەربەرزی گەڕایەوە نێو ماڵ و خانەوادەکەی.

لەو چوارچێوەیەشدا زوبێر عوسمان ئەندامی سەرکردایەتی و لێپرسراوی مەڵبەندی ٦ی سۆران و بەشێک لە کارگێڕ و لێپرسراوی بەش و ئەندامانی مەڵبەند و کادرانی کۆمیتەی سۆران و دیانا و برادۆست، هاوکات ژمارەیەک لە کەسوکارو خانەوادەکەی لە دەروازەی شاری سۆران لە پێشوازی و بەخێرهێنانەوەی هێرش_دا بوون، بەو بۆنەیەوە زوبێر عوسمان چەپکە گوڵی مەڵبەندی ٦ی سۆرانی پێشکەش بە هێرش نەجم مەرعان کرد و خۆشحاڵی خۆیان بە ئازادبوون و گەڕانەوەی بۆ نێو خزمان و دۆستانی دەربڕی.

لە بەرامبەریشدا هێرش نەجم بە ناوی خۆیی و خانەوادەو بنەماڵەکەی سوپاسی هەوڵە بەردەوامەکانی یەکێتی و زوبێر عوسمان و تەواوی چین و توێژەکانی کرد کە بۆ سەلماندنی بێتاوانی و هەوڵدان بۆ ئازادبوونی لە زیندان، لە ماوەی ئەو دوو ساڵ و نیوەی دەستگیرکردنی لە هەوڵدابوون بۆ ئازادکردنی.

لە ماوەی چەند ساڵی رابردوو دەزگا ئەمنییەکانی پارتی لە ژێر حکومڕانی قەڵەمڕەوی خۆی، بە ناحەق و دوور لە هەموو بنەماکانی مافی مرۆڤ، بە چەندین رێگەو دۆسیەی جیاواز خەڵکی سڤیلیان بە تۆمەتی ناڕەوا دەستگیر کردووەو دۆسیەی  تاوانبارکردن و مەلەفی پڕ لە تۆمەتی ناڕەوایان خستوونەتە پاڵ و دواتریش سزای زیندانیکردنی بەسەردا سەپاندوون و لە کونجی زینداین بێ بەڵگەی سەلمێندراو قایمی کردوون.

ئەمە لە کاتێکدایە کە کادرانی یەکێتی و خەڵکی ئازادیخواز و هاووڵاتیان و چین و توێژە جیاکانی کوردستان بێبەشنەبوون لە بەخشینەوەی ئەو جۆرە تۆمەت و سەپاندنی  ئەو کارە ناڕەوایانە بەسەریاندا، بەڵام بە پێی تێپەڕبوونی زەمەن راستی و دروستی و ساخنەبوونەوەی تۆمەتەکان بەسەر بەندکراوان  ئاشکرا بوون و بۆ رای گشتیی روونبووەتەوە، کە پشوو درێژی و ئیرادەو ورەی پۆڵاینی تێکۆشەران و ئازادیخوازان و بێتاوانی بەندکراوان لە بەندیخانەکان و ئازادبوونیان، هەڵهاتنی خۆری ئازادی و سەرکەوتنی بیرو باوەڕی نیشتمانیی و نەتەوەییە، بەسەر کۆی زوڵم و زۆری و حکومی تاکڕەویی و خۆسەپاندن و پاوانخوازی .

PUKMEDIA