بورهان سەعید سۆفی:سەرسەختانە داکۆکی لەمافە رەواکانی هەڵەبجەییەکان بکەین

PUKMEDIA

هەڵەبجە

لە ساڵیادی کارەساتی کیمیابارانکردنی شاری هەڵەبجەدا بورهان سەعید سۆفی ئەندامی مەکتەبی سیاسی (ی.ن.ك) و لێپرسراوی مەکتەبی شەهیدان و تێکۆشەران پەیامێک بڵاودەکاتەوە.

دەقی پەیامەکە...

لە ساڵیادی کارەساتی کیمیابارانکردنی شاری هەڵەبجەی سوتماک و پایتەختی ئاشتیدا، درود بۆ ڕۆحی بەرزە فڕی شەهیدانی نەمری هەڵەبجە دەنێرم.

ئەمڕۆ ٣٥ ساڵ بەسەر گەورەترین تاوان لە مێژوی مرۆڤایەتیدا دەرهەق بە گەلی کورد لەلایەن ڕژێمی بەعسی فاشیستەوە تێپەڕدەبێت، کارەساتێك کە بۆ هەمیشە لەنێو بیرەوەریماندا دەمێنێتەوە، هێند جەرگبڕە کە سارێژبوونی ئەستەمە.
کیمیابارانی هەڵەبجەی سیمبولی ئاشتی و پێکەوە ژیان، بەدڕندانەترین کارەساتی سەدە هەژمار دەکرێت، کە بەهۆیەوە پێنج هەزار ڕۆڵەی کورد شەهیدبوون و بە هەزاران کەسیش بریندار و بێسەرو شوێن بوون، مەخابن تا ئەمڕۆش ئاسەواری ئەو تاوانە سارێژ نەبووە و ڕۆژانە بەبەرچاومانەوە، برینداران و بەرکەوتوانی چەکی کیمیاوی بێنازانە سەردەنێنەوە و کۆچی دوایی دەکەن.

هیوادارم لەم ڕۆژە پڕ لەماتەمەدا، بەڵێن بە خوێنی شەهیدەکانمان بدەین، بە یەکڕیزی و تەبایی نێوانمان کوردستانەکەمان لە هەڕەشە و پیلانی نەیارانمان بپارێزین، پێگەی خۆمان زیاتر بەهێز بکەین و هەنگاوی جدی و خێرا بنێین بە ئاڕاستەی خزمەتکردنی کەسوکاری سەربەرزی شەهیدان و تێکۆشەرانی دێرین و کۆمەڵانی خەڵک، ئەم ڕۆژە بکەینە وەرچەرخانێک بۆ پێشکەشکردنی خزمەتگوزاری شایستە بە پارێزگای هەڵەبجە و کۆی ناوچەکانی تر، تێبکۆشین بۆ بەجینۆساید ناساندنی تاوانی کیمیابارانی هەڵەبجە لەسەر ئاستی جیهان و سەرسەختانە داکۆکی لەمافە ڕەواکانیان بکەین.

بورهان سەعید سۆفی
ئەندامی مەکتەبی سیاسی (ی.ن.ك) و 
لێپرسراوی مەکتەبی شەهیدان و تێکۆشەران

٢٠٢٣/٣/١٦

PUKMEDIA