نوێنەری زیندانیانی بادینان: بەبیانووی جۆراوجۆر زیندانیان ئازاد ناکرێن

PUKMEDIA

زیندانیانی بادینان

نوێنەری زیندانیانی بادینان رایدەگەیەنێت: "كەمتر لە 24 سەعات مابوو بۆ ئازادبوونی بەشێك لە زیندانیانی بادینان، كەچی دادگای كەتنی 2ی ھەولێر سزایەكی نوێی بەسەر رۆژنامەنووس گۆھدار زێباریدا سەپاند، ئەمەش لە كاتێكدایە پێشتر بەفەرمانی سەرۆكی ھەرێم، سزای شەش ساڵ زیندانیكردنی ھەریەكە لە (شێروان شێروانی، شڤان سەعید، ئەیاز كەرەم، ھاریوان عیسا و گوھدار زێباری) كەمكرایەوە بۆ (دوو ساڵ و چوار) مانگ دەشڵێت، بڕیارەكەی دادگا سوكایەتییە بە خودی دادگا و دیموكراسییەت".

ئەیھان سەعید نوێنەری زیندانیانی بادینان لە پەیامێكدا كە ئاڕاستەی رای گشتی كردووە رایگەیاندووە: "لە كاتێكدا كەمتر لە 24 سەعات مابوو بۆ پێشوازی ئازادبوونی كەسوكارمان، دادگای كەتنی 2ی ھەولێر بەپێ ماددەی 279ی سزای عیراق و بێ ھیچ ئاگاداكردنەوەیەك بۆ پارێزەرەكانی سزایەكی نوێ بەسەر رۆژنامەنووس گۆھدار زێباری سەپاند بە بیانووی لۆگۆ گۆڕینەوەی ئۆتۆمبێلەكەی لە "نیسان" بۆ "دایو" لە پێش سێ ساڵ (لە كاتێكدا ھیچ لۆگۆی نە گۆڕیوە و ئەمە پەیوەندی بە غرامەیەكی ھاتوچۆ ھەیە)، ئەم سزایە و بەھێشتنەوە شێروان شێروانی و قارەمان شوكری لە زیندان سوكایەتی بە دادگا و دیموكراسییەت دەكات".

راشیگەیاندووە: "بۆ ڕای گشتی و كۆمەڵگای نێودەوڵەتی ئاشكەرایە كە رۆژنامەنووس و چالاكوانانی بادینان ماوەی دوو ساڵ و ھەشت مانگە لە پڕۆسەیەكی ناسایایی و نادیموكراسیدا سزادەدرێن و ئەو نادادییە دژبە رەچاوكردنی سادەترین بڕگەكانی یاسا كارپێكراوەكانی ھەرێم، بەندەكانی دەستوری عیراق و بگرە دژبە 13 ماددەی جاڕنامەی مافی مرۆڤی نێودەوڵەتی بوون، ئەمەش سومعەی ھەرێمەكەمان ناشرینتر كردووە و لە جیاتی بە خوداچوونەوە و باشتركردنی دۆخەكە".

نوێنەری زیندانیانی بادینان راشیگەیاندووە: "ئەمە لە كاتێكدایە بەفەرمانی سەرۆكی ھەرێمی كوردستان، سزای شەش ساڵ زیندانیكردنی ھەریەكە لە (شێروان شێروانی، شڤان سەعید، ئەیاز كەرەم، ھاریوان عیسا و گوھدار زێباری) كەمكرایەوە بۆ (دوو ساڵ و چوار) مانگ، بەلەبەرچاوگرتنی ماددەی 331ی ئازادكردنی مەرجی (الإفراج الشرطی)، پێویست بوو ھەر پێنج زیندانییەكە لە مانگی 8ی پارساڵدا ئازادكرابان".

PUKMEDIA