بەشدار حەسەن:مافی زیندانیانی هەولێر و دهۆک پێشێلدەکرێت

PUKMEDIA

بەشدار حەسەن سەرۆکی تیمی پارێزەرانی سزادراوانی بادینان

سەرۆکی تیمی پارێزەرانی سزادراوانی بادینان دەڵێت: جیاوازییەکی زۆر لە مافی زیندانیانی سلێمانی لەگەڵ هەولێر و دهۆک هەیە و پێویستە زیندانیانی هەولێر و دهۆکیش وەک زیندانیانی سلێمانی مافەکانیان پارێزراو بێت.

بەشدار حەسەن سەرۆکی تیمی پارێزەرانی سزادراوانی بادینان بە سایتی رەسمی یەکێتیی نیشتمانیی کوردستان PUKMEDIA ی راگەیاند:"جیاوازییەکی زۆر لەنێوان مافی زیندانکراوانی سنوری پارێزگای سلێمانی لەگەڵ هەولێر و دهۆک هەیە و لە سلێمانی مافی زیندانیان پاریزراوترە".

دەشڵێت:"لەسلێمانی لەهەفتەیەکدا پاریزەران دەتوانن پێنج رۆژ زیندانیان ببینن، بەڵام لەهەولێر تەنها یەک رۆژ پارێزەران مافیان هەیە زیندانیان ببینن، لەگەڵ ئەوەشدا لەسلێمانی زیندانیان بەشداری خولەکان دەکەن و بەوتەی خۆیان زۆر لەبەڕێوەبەری چاکسازییەکەیان رازین، بەڵام لە هەولێر بەپێچەوانەوە زیندانیان ترسیان لەبەڕێوەبەری چاکسازییەکەیان هەیە و بێبەشکراون لە خولەکان".

سەرۆکی تیمی پارێزەرانی سزادراوانی بادینان ئەوەشی خستەڕوو:" زیندانیانی هەولێر و دهۆک بەراورد بە زیندانیانی سلێمانی لە چەندین مافی دیکە بێبەشکراون و سزای تایبەتیان بەسەردا دەسەپێنریت بۆ نمونە، کاتێک زیندانییەک لەچاکسازی سلێمانی کێشەیەک دروست دەکات دوو تا سێ رۆژ سزا دەدرێت، بەڵام لەچاکسازی هەولێر کاتێک زیندانییەک کێشەیەک دروستدەکات 15 رۆژ بۆ مانگێک سزا دەدرێت، ئەوەش ئەو نادادییەیە کەبەرامبەر زیندانیانی هەولێر و دهۆک پەیڕەو دەکرێت".

بەشدار حەسەن لەرێی PUKMEDIAوە داوا لە رێکخراوەکانی مافی مرۆڤ کرد، کە بەدەم مافەکانی زیندانیانی هەولێر و دهۆکەوە بچن و رێگە نەدەن مافەکانیان پێشێل بکرێت.

PUKMEDIA