ئەمریکاو بەریتانیا پشتیوانی لە کۆبوونەوەکەی یەکێتی و پارتی دەکەن

PUKMEDIA

لۆگۆی کونسوڵخانەی ئەمریکا و بەریتانیا لە هەولێر

کونسوڵخانەکانی ئەمریکا و بەریتانیا لە هەرێمی کوردستان پێشوازی لە کۆبوونەوەکەی ئەمڕۆی یەکێتیی نیشتمانیی کوردستان و پارتی دیموکراتی کوردستان دەکەن و بە هەنگاوێکی گرنگی دۆزینەوەی خاڵی هاوبەشی نێوانیان ناوی دەبەن.

كونسوڵخانه‌ی گشتی ئه‌مه‌ریكا له‌ هه‌ولێر، پێشوازی له‌ كۆبوونه‌وه‌ی ئه‌مڕۆی یه‌كێتی و پارتی ده‌كات.
ئه‌مڕۆ شەممە 28-1-2023، هه‌ردوو مه‌كته‌بی سیاسی یه‌كێتی و پارتی به‌ مه‌به‌ستی چاره‌سه‌ركردنی كێشه‌كانی نێوانیان، له‌ سلێمانی كۆبوونه‌وه‌.
لەوبارەیەشەوە كونسوڵخانه‌ی گشتی ئه‌مه‌ریكا له‌ هه‌ولێر له‌ تویته‌ر رایگه‌یاند‌ووە: "پێشوازی له‌م هه‌وڵه‌ی هاوپه‌یمانانمان له‌ هه‌رێمی كوردستان بۆ چاره‌سه‌كردنی كێشه‌ ناوخۆییه‌كان ده‌كه‌ین، كه‌ له‌به‌رژه‌وه‌ندی خه‌ڵكی كوردستاندایه‌.
هه‌روه‌ها كونسوڵخانه‌ی ئه‌مریكا له‌ هه‌ولێر ئاماژه‌ی به‌وه‌شكردووه‌: "یه‌كێتی و پارتی به‌یه‌كه‌وه‌ ده‌توانن كوردستانێكی ئارامتر و باشتر بونیات بنێن".
دواجار له‌ تویته‌كه‌ی باڵیۆزخانه‌ی ئه‌مریكا له‌ هه‌ولێردا هاتووه‌: "ماڵێكی یه‌كگرتوو، هه‌میشه‌ سه‌ركه‌وتوو ده‌بێت".

هەر لەوبارەیەوە كونسوڵخانەی گشتی بەریتانیا لە هەولێر لەبارەی کۆبوونەوەکەی ئەمڕۆی یەکێتی و پارتی لە تویتێکدا پێشوازی لەكۆبوونەوەی یەكێتی و پارتی دەكات.
كونسوڵخانەی بەریتانیا لەهەرێمی کوردستان رایدەگەیەنێت: "كۆبوونەوەی یەكێتی و پارتی یەكەم هەنگاوی گرنگە بۆ دۆزینەوەی خاڵی هاوبەش لەبەرژەوەندی هەرێم ".
ئاماژەبەوەشدەکات: "بەپەرۆشەوە چاوەڕێی ئەوەین كۆبوونەوەكانی داهاتوو ئەنجامی باشیان هەبێت".

ئەمڕۆ وه‌فدی پارتی دیموكراتی كوردستان به‌ سه‌رۆكایه‌تی مه‌حمود محه‌مه‌د و به‌ یاوه‌ری جه‌عفه‌ر ئیمنیكی و پشتیوان سادق و عه‌لی حسێن و ئومێد سه‌باح و هێمن هەورامی گه‌یشته‌ مه‌كته‌بی سیاسی یه‌كێتی له‌ سلێمانی و له‌لایه‌ن قوباد تاڵه‌بانی سه‌رۆكی وه‌فدی یه‌كێتی و ئاسۆ مامه‌ند و ده‌رباز كۆسره‌ت ره‌سوڵ و ئه‌مین بابه‌شێخ و د. دارا رەشید و د.میران محه‌مه‌د پێشوازییان لێكرا.

لەدوای کۆبوونەوەکەش هەردوو مەکتەبی سیاسی یەکێتی و پارتی راگەیەندراوێکیان بڵاوکردەوە و ئاماژەیان بەوەدا هەردوولا رێککەوتن لەدەرفەتێکی نزیکدا کۆبوونەوەی دیکەی هەردوو وەفد ئەنجامبدرێت.
PUKMEDIA