Trump: Em bi Îranê re danûstandinan dikin û divê tengav sibe bê vekirin

AFP

Trump ji Rojnamevanan re diaxive

Serokê Amerîka Donald Trump aşkere kir ku, ew li ser daxwaza Erebistana Siûdî, Îmarata Erebî û Qeterê ji lêdana li dijî Îranê paşve gav avêtiye, tekez jî kir ku Washington niha bi Tehranê re di nav danûstandinan de ye û "derfeta dawî daye wê" beriya ku serî li vebijarka leşkerî bide.

Trump êvariya îro Duşemê, di daxuyaniyên li Koşka Spî de ragihand ku, danûstandinên bi Îranê re "niha berdewam in", û tiştê ku wî wekî "derfeta dawî" bi nav kir da Tehranê da ku ji lêdaneke leşkerî ya bihêz dûr bikeve, û daxwaz kir ku tengava Hurmizê heta sibê Sêşemê bi tevahî bê vekirin.

Trump got: "Ev derfeta wan a dawî ye ku belgeyeke baş îmze bikin," û tekez kir ku welatê wî rê nade Îranê ku bacê bide ser keştiyên ku ji tengavê derbas dibin.

Serokê Amerîka da zanîn ku danûstandin di qonaxa xwe ya yekem de wê li ser azadiya keştîvaniyê ya li Hurmizê rawestin, di heman demê de gotûbêjkirina bernameya atomî ya Îranê bo qonaxa duyem tê paşxistin ku tê payîn demek dirêjtir bidome.

Li gorî ku rayedarên Amerîkî dibêjin, tu gera danûstandinên nû an jî hevdîtinên rasterast nehatiye plankirin û têkilî ji aliyê tîmê Nûner Steve Witkof û Jared Kushner ve bi rêya navbeynkaran bi aliyê Îranî re tên meşandin.

Ev yek nîşan dide ku Trump danûstendina peyamên nerasterast wekî "danûstandin" bi nav dike, di demekê de ku Tehran vê pênaseyê red dike û tenê danûstandinên xwe yên bi Umanê re qebûl dike.

PUKMEDIA