Zeydî: Em rê nadin ku ji axa Iraqê gef li Îranê werin xwarin

Êraq 04:59 PM - 2026-07-23

Danustandinên Iraq û Îranê li Tehranê

Serokwezîrê Iraqê Elî Falih Zeydî li Tehranê, daxwaza xurtbûna peywendiyên bi Îranê re kir û banga veberhênanên hevpar di warên cuda de kir.

Li gorî daxuyaniyekê ku ji aliyê nivîsgeha ragihandinê ya serokwezîr ve hatiye belavkirin, "Îro Pêncşemê, Serokwezîr Elî Falih Zeydî serokatiya şanda Iraqê kir di hevdîtinên hevpar de li gel aliyê Îranî ku ji aliyê Serokkomarê Îranê Mesûd Pizişkiyan ve dihat nûnertîkirin, di hevdîtinê de her du aliyan çend pirsên hevberjewendî gotûbêj kirin, ji wan jî diyarkirina mekanîzmayekê ji bo karê Komîsyona Aborî ya Iraq û Îranê ya hevbeş."

Li gorî daxuyaniyê Elî Zeydî di nav hevdîtinan de tekez kiriye ku serdana wî ya ji bo Komara Îslamî kûrahiya peywendiyan nîşan dide û nûkirina wane, û ew wek pira hezkirinê di navbera her du gelan de ye. Her wiha balkişand li ser hevkariya ku her du welatan di warê olî, şaristanî, erdnîgarî û çandî de digihîne hev e.

Zeydî diyar jî kiriye ku, ew serdan ji bo gotûbêjkirina mijarên peywendîdar bi her du welatan û herêmê ve ye, û tekez kir ku, "Ewlehiya me hevpare û em rê nadin tu gef li ser Îranê ji axa Iraqê ve destpê bikin." Her wiha helwesta Îranê di piştgirîkirina Iraqê de di dema şerê dijî rêxistina terorîst a DAİŞ'ê de bi bîr anî û bilind nirxand û banga veberhênanên hevpar di warên cuda de kir.

Ji aliyê xwe ve, Serokkomarê Îranê spasiya helwesta rumet a gelê Iraqê kir di veguhastin û merasîma xatirxwestina ji cenazeyê rehmetî Elî Xameneyî de. Her wiha balkişand li ser kûrahiya tiştên hevpar di navbera her du gelan de û tekez kir ku îstiqrara ewlehiyê gelekî girîng e û bandoreke erênî li ser rastiya geşepêdana dualî dike, û balkişand ku derfetên girîng ên veberhênana hevpar di navbera her du welatan de hene.

Îmzakirina çend peyman û yadeştên hevtêgihiştinê

Îro li paytext Tehranê, bi serperştiya Serokê Encumena Wezîran Elî Falih Zeydî û Serokê Îranê Mesûd Pizişkiyan, merasîma îmzakirina çar peymanname û yadeşten hevtêgihiştinê di warên cûda de hat lidarxistin, armanca van peymanan xurtkirina hevkariya dualî û hevbeşiya di navbera her du welatên cîran de ye, ku ev in:

1- Peymannameya veguhastin û barkirina navneteweyî ya bejahî ji bo kelûpelan.
2- Yadeşta hevtêgihiştinê ya dirêjkirina xeta hesin ya trênê ji Kirmaşan - Xusrewî - Xaneqîn - Bexda.
3- Yadeşta hevtêgihiştinê ya destxuşkiya di navbera Şaredariya Bexdayê û Şaredariya Tehranê de.
4- Yadeşta hevtêgihiştinê di warê rêveberiya hikûmetê û perwerdekirina çavkaniyên mirovî de.

Ji aliyê Îraqê ve, her yek ji Wezîrên Derve, Kehreba, Darayî û Plandanînê bi wekalet ev peymanname û yadeşten hevtêgihiştinê îmza kirin.

PUKMEDIA