Talebanî: Divê Kurdistan û Êraq ji bo parastina serweriya welat kar bikin

Nivîsgeha Ragihandinê yê Qubad Talebanî

Qubad Talebanî û Konsulê Giştî yê Amerîka li Herêma Kurdistanê

Cîgirê Serok Wezîr Qubad Talebanî pêşwaziya Konsulê Giştî yê Amerîka li Herêma Kurdistanê Mark Straw kir, di wê hevdîtinê de çendîn mijarên balkêş hatin gotûbêjkirin.

Di civînê de ku roja sêşemê 16.1.2024 li bajarê Hewlêrê hat lidarxistin, Konsulê Giştî yê Amerîkayê ji ber êrîşa şeva borî ya li ser Hewlêrê, hevxemiya welatê xwe ji hikûmet û welatiyên Herêma Kurdistanê re ragihand.
Di vê derbarê de Qubad Talebanî amaje bi wê yekê jî kir; Êdî bi tu behane nabe serweriya Êraq û Herêma Kurdistanê were binpêkirin û got: Êrîşên bi vî rengî bandorê li aramiya Herêmê dike û aloziyan zêde dike.
Cîgirê Serok Wezîr êrîş şermezar kir û got: Ji bo dawî li êrîş û binpêkirinên bi vî rengî bi awayekî mayînde were kirin, divê hêzên siyasî yên Kurdistanê bibin yek helwest û daxwaz ji her du hikûmetan ya Herêma Kurdistanê û Êraqê dikim  ku bi hev re hemû tedbîrên pêwîst ji bo parastina serweriya welêt bistînin.
Di heman hevdîtinê de Qubad Talebanî got; Her welatekî cîran ku nîgeraniya wî hebe, divê bi diyalog û aştiyane pirsgirêkan çareser bike, ne bi şer û bombebarankirina xaka Herêmê.

PUKMEDIA