Talebanî: Yekbûna Kurdan dê pêgeha Herêma Kurdistanê li Bexdayê bihêztir bike

Ofîsa Ragihandinê ya Qubad Talebanî

Qubad Talabanî û Tom Tugendhat

Cîgirê Serokwezîrê Herêma Kurdistanê Qubad Talebanî pêşwaziya Wezîrê Dewlet  yê Brîtanya bo karûbarên ewlehiyê Tom Tugendhat kir ,di civînê de çendîn mijarên balkêş hatin gotûbêjkirin.
Civîna ku roja 23-8-2023 li bajarê Hewlêrê hat lidarxistin ku  Cîgirê Serokê Fermangeha Peywendiyên Derve ya Hikûmeta Herêma Kurdistanê Daban Şadala û Konsula Giştî ya Brîtanya Rosie Cave tê de amade bûn , bo girîngiya  li ser pêwîstiya parastina yekrêziya Kurdan gotûbêj kirin.
Her du alî li ser wê yekê hemfikir bûn ku parastina yekrêziya navxwe ya Kurdistanê ji aliyekî ve bandorê li ser parastina asayîş û aramiya siyasî li navçeyê dike, ji ber ku heta niha jî metirsiya teror û komên terorîstî heye, ji aliyê din ve jî bandorê li peywendiyên di navbera Herem û Begdayê  de dike û pêgeha kurdan li Bexdayê bihêztir dibe.
Di beşeke din ya hevdîtinê de, pirsgirêkên li Wezareta Pêşmerge û proseya çaksaziyê di wê wezaretê de hatin gotûbêjkirin. Di vê derbarê de wezîrê Brîtanya bo karûbarên asayîşê balkişand li ser çareser kirina pirsgirêkên  di nava wezaretê de, ji ber ku berdewamiya pirsgirêkan  bandoreke nerênî li ser aramiya Herêma Kurdistanê û Iraqê dike.
Her wiha şanda Brîtanya behsa çawaniya rûbirûbûna koçberên neyasayî , tawanên rêkxistî , madeyên hişber jî kir û şanda Brîtanya daxwaz ji Hikûmeta Herêma Kurdistanê kir ku ji bo jinavbirina tawanên organîze, şerê li dijî bandên madeyên hişber û nehîştina  koçberên neyasayî zêdetir hevkariyê bike.
Derbarê mijara koçberiya neyasayî de jî Cîgirê Serokwezîr got:“Ev pirs pêwîstî bi hemahengî û hevkariyeke zêdetir heye û yek ji çareyên ji bo kêmkirina koçberiya neyasayî ew e ku Brîtanya û welatên rojava teşwîq bikin ku şîrket û sermayedarên xwe bên Herêma Kurdistanê û herwiha alîkarî û beşdariya geşepêdana aborî ya herêmê bikin."
PUKMEDIA