نوێنەران میوانداری وەزیری دارایی و پارێزگاری بانکی ناوەندی دەکات

ئاژانسەکان

کۆبونەوەی ئەنجومەنی نوێنەران

بڕیارە ئەمرۆ پێنجشەممە، ئەنجومەنی نوێنەران وەزیری دارایی و پارێزگاری بانکی ناوەندی میوانداری بکات بۆ تاوتوێکردنی بڕیاری حکومەتی فیدراڵی سەبارەت بە هەموارکردنەوەی نرخی دۆلار.

لەو بارەیەوە د. بڕیار ڕەشید، ئەندامی ئەنجومەنی نوێنەران لە فراکسیۆنی یەکێتیی نیشتمانیی کوردستان بە PUKMEDIA ی راگەیاند: ئەنجومەنی نوێنەران لە دانیشتنی رۆژی چوارشەممەدا، لێکەوتەکانی بڕیاری حکومەتی فیدراڵی بە ئامانجی هەموارکردنەوەی نرخی دۆلار تاوتوێ کرد.

وتیشی: سەرۆکایەتی ئەنجومەنی نوێنەران لەسەر داوای ژمارەیەک لە پەرلەمانتاران بڕیاریدا هەریەکە لە فالح ساری وەزیری دارایی و نزار ناسڕ پارێزگاری بانکی ناوەندی میوانداری بکات بۆ تاوتوێکردنی ئەم بڕیارە و هۆکارەکانی دەرکردنی و قەبارەی کاریگەرییەکەی لەسەر دۆخی ژیانی هاووڵاتییان.

ئەمە لە کاتێکدایە بانکی ناوەندی عێراق ڕۆژی چوارشەممە ڕایگەیاند، نرخی ئاڵوگۆڕی دیناری عێراقی بەرامبەر دۆلاری ئەمەریکی لە ڕۆژی چوارشەممە 7ی تشرینی یەکەمی 2026ـەوە هەموار دەکرێتەوە، بەم شێوەیەی خوارەوە:

نرخی کڕینی دۆلار لە وەزارەتی دارایی: 1500 دینار بۆ هەر دۆلارێک.

نرخی فرۆشتنی دۆلار بە بانکەکان: 1510 دینار بۆ هەر دۆلارێک.

نرخی فرۆشتنی دۆلار بە کاش: 1520 دینار بۆ هەر دۆلارێک.

PUKMEDIA