عەلی زەیدی: عیراق قۆناغی شەڕو تیرۆری تێپەڕاندووە

نوسینگەی راگەیاندنی سەرۆك وەزیرانی عیراق

وێنەیەك لەبۆنەی رۆژی سەروەری عیراق

عەلی زەیدی، سەرۆك وەزیرانی عیراق، كۆتاییهاتنی ئەركی هاوپەیمانیی نێودەوڵەتی و رێكارەكانی كۆنتڕۆڵكردنی چەكی راگەیاندو ئاماژەی بەوەشكرد: كە عیراق قۆناغی شەڕ و تیرۆری تێپەڕاندووە و دەچێتە قۆناغێكی نوێوە.

عەلی زەیدی، سەرۆك وەزیرانی عیراق، رایگەیاند: ئەمڕۆ 1ی تشرینی یەكەمی 2026، ئەركی هێزەكانی هاوپەیمانیی نێودەوڵەتیی بە هەموو جۆرەكانییەوە (زەمینی، ئاسمانی و دەریایی)، لە عیراق كۆتایی هات، ئەمەشی وەك دەستكەوتێكی نیشتمانی بۆ بەدیهێنانی سەروەریی تەواوەتی وڵات بە هاوكاریی سوپا و هێزە ئەمنییەكان وەسف كرد. 

سەرۆك وەزیران ئاماژەی بەوەشكرد: ئەم رێكەوتە دەستپێكێكی گرنگە بۆ چارەسەركردنی پرسی چەك لە دەرەوەی دەسەڵاتی دەوڵەت لەڕێگەی نەخشەڕێگا و خشتەیەكی كاتی كە لە 30ی حوزەیرانی 2027 تێپەڕناكات، بە شێوەیەك بڕیاری جەنگ و ئاشتی تەنها لە دەستی دەسەڵاتە دەستوورییەكاندا دەبێت.

هاوكات جەختی لەسەر رێگریكردن لە بەكارهێنانی خاك و ئاسمانی عیراق بۆ هێرشكردنە سەر وڵاتانی دراوسێ كردەوە و ئاشكرای كرد: كە حكومەت راستەوخۆ دەستدەكات بە كڕینی سیستەمی بەرگریی ئاسمانی، لەگەڵ دەركردنی یاسای حەشدی شەعبی بۆئەوەی لەژێر فەرمانی فەرماندەی گشتیی هێزە چەكدارەكاندابن.

 عەلی زەیدی لە كۆتاییدا ئاماژەی بەوەشكرد: كە عیراق قۆناغی شەڕ و تیرۆری تێپەڕاندووە و دەچێتە قۆناغێكی نوێوە كە تێیدا دۆخ و ژیانی هاووڵاتیان باشتر دەبێت.

PUKMEDIA