سەرۆککۆمار: بڕیاری جەنگ و ئاشتی تەنها لە دەستی دەوڵەتدا بێت

سەرۆکایەتی کۆمار

نزار ئامێدی سەرۆککۆماری عیراق

نزار ئامێدی سەرۆککۆماری عیراق پەیامێکی بەبۆنەی رۆژی سەروەرییەوە بڵاوکردەوە و رایگەیاند: سەروەری بەبێ دەوڵەتێکی بەهێز و سەروەریی یاسا بەدی نایەت، دووپاتیشی کردەوە، کە بڕیاری جەنگ و ئاشتی پێویستە تەنها لە دەستی دەوڵەتدا بێت.

سەرۆککۆمار لە پەیامەکەیدا پیرۆزبایی لەگەلی عیراق کرد، بەبۆنەی رۆژی سەروەری و دووپاتیشی کردەوە کە سەروەری عیراق و سەربەخۆیی بڕیاری نیشتمانی، یەکپارچەیی خاک و سەلامەتیی دامەزراوەکان نەگۆڕن و سازشیان لەسەر ناکرێت، هاوکات ویست و بەرژەوەندیی عیراقییەکان بنەمای دیاریکردنی داهاتووی پەیوەندییەکانی عیراق دەبن.

سەرۆککۆمار، لە بەشێکی دیکەی پەیامەکەیدا، جەخت دەکاتەوە کە سەروەری بەبێ دەوڵەتێکی بەهێز و سەروەریی یاسا بەدی نایەت و رایگەیاند: بڕیاری شەڕ و ئاشتی تەنها لە دەستی دەوڵەتدایە، هەروەها کۆکردنەوەی چەک و پابەندبوونی هەموو هێزەکان بە دەستور و یاساەوە، بنەمایەکی سەرەکین بۆ سەروەری و پاراستنی سەقامگیری و شکۆی دەوڵەت،لەو چوارچێوەیەشدا داوای لە سەرجەم هێزە سیاسییەکان کرد بەرژەوەندییە باڵاکان لە پێشینەی کارەکانیان دابنێن.

لە کۆتایی پەیامەکەیدا ، نزار ئامێدی سەرۆککۆماری عیراق، ئاماژەی بەوە کرد کە بە کۆتاییهاتنی ئەرکی هاوپەیمانیی نێودەوڵەتی، عیراق پێدەنێتە قۆناغێکی نوێ کە لەسەر بنەمای سەروەریی تەواو، هاوبەشیی هاوسەنگ، بەرژەوەندیی هاوبەش و دەستوەرنەدان لە کاروباری ناوخۆ بنیات دەنرێت.

PUKMEDIA