گفتوگۆكانی هەرێم و عیراق بۆ بودجە چڕتر دەكرێنەوە

PUKMEDIA

هەرێم و عیراق

لەگەڵ نزیك بوونەوەی ساڵی نوێ و ئامادەكارییەكان بۆ پەسندكردنی بودجەی ساڵی 2027، كۆبوونەوەكانی نێوان هەرێمی كوردستان و عیراق چڕتر دەبنەوەو بەیانی ئەمڕۆ جارێكی دیكە هەردوو وەفد كۆبوونەوە.

ئەمەش لەكاتێكدایە، لە كۆبوونەوەی ئاسایی خۆیدا كە دوێنێ چوار شەممە بەڕێوەچوو، ئەنجومەنی وەزیران، وەفدی باڵای دانوستانكاریی حكومەتی هەرێمی كوردستانی ر‌اسپارد كە لە دانوستانەكانی بودجەی ساڵی 2027دا بەردەوام بێت لە هەوڵەكان بۆ جێگیركردنی مووچە، دەرماڵە، شایستە دارایییەكان و پێداویستییەكانی وەزارەتی پێشمەرگە لە چوارچێوەی خەرجییە سیادییەكان، هاوشێوەی وەزارەتی بەرگریی فیدراڵ، هەروەها گرنگیی ڕ‌ۆڵی نوێنەر و فراكسیۆنە كوردستانییەكان لە بەغدا بۆ داكۆكیكردن لەم داواكارییە لە پڕۆسەی ئامادەكردن و پەسەندكردنی بودجەی 2027 دووپات كرایەوە.

هاوكات پشكی هەرێم لەبودجەی عیراق و هاوتاكردنی مووچەو شایستە داراییەكانی وەزارەتی پێشمەرگەو بە هەمیشەیی كردنی گرێبەستەكان و دامەزراندنی سێ یەكەمەكان، لە گرنگترین ئەو پرسانەن كە لەنێوان هەرێم و عیراقدا گفتوگۆیان لەبارەوە دەكرێت.

لەئێستادا لەسەر ئاستی باڵای حكومەتەكەی عەلی زەیدی و ئەنجومەنی نوێنەرانی عیراق كار لەسەر ئامادەكردنی رەشنووسی بودجەی ساڵی 2027ی عیراق دەكرێت و ئامادەكاریی دەكرێت بۆ ئەوەی لەزووترین كاتدا پڕۆژەكە لەسەر خواستی هەرێم و عیراق و لایەنە سیاسییەكان بنێردرێتە ئەنجومەنی نوێنەران و دەنگی لەسەر بدرێت. 

پێشتر ئەنجومەنی نوێنەرانی عیراق، بودجەی سێ ساڵی (2023، 2024، 2025) پەسند كرد، بەڵام بۆ ساڵی 2026 عیراق یاسای بودجەی نەبوو، چونكە سەرقاڵی پێكهێنانی كابینەی نوێی حكومەتی عیراق بوو، لەئێستاشدا حكومەت و پەرلەمان هەوڵەكانیان چڕكردووەتەوە بۆ ئەوەی بەزووترین كات یاسای بودجەی 2027 پەسند بكرێت.

PUKMEDIA