دەستەی دەستپاکی: دووپەرلەمانتار بە حەوت ساڵ زیندانی سزا دران

دەستەی دەستپاکی

لۆگۆی دەستەی دەستپاکی عیراق

دەستەی دەستپاکی عیراق، رایگەیاند، هەر یەک لە پەرلەمانتاران عالیە نوسەیف و ئەشواق جبوری بە حەوت ساڵ زیندانیکردن سزادران، لەگەڵ پابەندکردنیان بە گەڕاندنەوەی ئەو پارەیەی کە بە ناڕەوا کۆیان کردووەتەوە لەگەڵ سزای پێبژاردن.

بەپێی راگەیەندراوێکی دەستەی دەستپاکی، ئەمڕۆ 23ی9ی2026، دادگای تاوانی رووبەڕووبونەوەی گەندەڵی، بە تۆمەتی گەندەڵی و بە ناڕەوا کۆکردنەوەی پارە، سزای  حەوت ساڵ زیندانیکردنی بەسەر پەرلەمانتار عالیە نوسەیف سەپاند.

هەر بەپێی راگەیەندراوەکە، ئەو پەرلەمانتارە بە ناڕەوا زیاتر لە 14 ملیار دینار و زیاتر 12 ملیۆن دۆلاری کۆکردووەتەوە، بەمەش دادگا ناوبراو پابەند دەکات، بڕی 61 ملیار دینار وەک گەڕاندنەوەی پارەکە و پێبژاردن بۆ خەزێنەی حکومەت بگێڕێتەوە.

دەستەی دەستپاکی، ئاماژەی بەوەشکردووە، کە پەرلەمانتار عالیە نوسەیف لە کەیسێکی دیکەدا بە سێ ساڵ زیندانیکردن توند سزادرا، بەهۆی ئەوەی زانیاری ناڕاستی لە فۆڕمی ئەستۆپاکی نوسیوەو، زانیاری دیکەشی شاردووەتەوە.

لەلایەکی دیکەوە، پەرلەمانتار ئەشواق سالم جبوری بە حەوت ساڵ زیندانیکردن سزادرا، بەهۆی ئەوەی  نزیکەی 12 ملیار دیناری بە ناڕەوا کۆکردووەتەوە، بۆیە دادگا ناوبراوی پابەند کردووە،  بڕی 23 ملیار دینار بگێڕێتەوە،کە پارەکە و پێبژاردن دەگرێتەوە.

هاوکات، لە بڕیارێکی دیکەدا، سزای سێ ساڵ زیندانکردنی توندی بەسەر ئەو پەرلەمانتارەدا سەپاند، بەهۆی ئەوەی زانیاری ناڕاستی لە فۆڕمی ئەستۆپاکی نوسیوە و زانیاری شاردووەتەوە.

PUKMEDIA