كۆبوونەوەكەی نیویۆرك نرخی نەوتی بۆ خوار 100 دۆلار دابەزاند

PUKMEDIA

نرخی نەوت

نرخی نەوتی خاوی برێنت 0.8% دابەزی و گەیشتە  98.45 دۆلارو نەوتی خاوی تەكساس بەڕێژەی 1.1% دابەزی و گەیشتە 89.55 دۆلار، ئەمەش بۆ یەكەمجارە لەدوای 8ی ئەیلوولەوە نرخەكان بۆ خوار 100 دۆلار دابەزن.

لە دواكۆبوونەوەی بازاڕەكانی نەوتدا، نرخی گرێبەستەكانی نەوتی خاوی برێنت بەڕێژەی 0.8% دابەزی و گەیشتە 98.45 دۆلار بۆ هەر بەرمیلێك، كە ئەمەش یەكەمجارە لە دوای 8ی ئەیلوولەوە نرخی بەرمیلێك نەوتی برێنت بۆ خوار 100 دۆلار دابەزێت، هاوكات نرخی نەوتی خاوی تەكساس بەڕێژەی 1.1% ڕووی لە دابەزین كردو گەیشتە 89.55 دۆلار بۆ هەر بەرمیلێك.

ئەم دابەزینە دوای ئەوە دێت، كەدۆناڵد ترەمپ رایگەیاند: لێپرسراوانی ئەمریكا لەگەڵ نوێنەرانی ئێران لە نیویۆرك كۆبوونەوەیەكی "زۆر باش"یان ئەنجامداوە.

هاوكات ئاژانسی هەواڵیی رۆیتەرز لەڕاپۆرتێكدا ئاماژەی بەوەكردووە: كە ئێران ئامادەیە گەروی هورمز بكاتەوە، بەمەرجێك ئەمریكا گەمارۆی سەر بەندەرەكانی هەڵبگرێت، ئەمەش هۆكار بوو بۆ كەمبوونەوەی گرژییەكان لەبازاڕی نەوتدا.

گەروی هورمز بە یەكێك لەگرنگترین رێڕەوە ئاوییەكانی جیهان دادەنرێت كە پێش دەستپێكردنی گرژییەكان رۆژانە پێنج یەكی بەرهەمی نەوت و گازی سروشتیی جیهانی پێدا تێپەڕ دەبوو.

PUKMEDIA