کۆبوونەوەی گشتی کۆمەڵەی نەتەوەیەکگرتووەکان بەڕێوەدەچێت

UN news

كۆبوونەوەی گشتی کۆمەڵەی نەتەوەیەکگرتوەکان

ئەمڕۆ 22ی9ی2026، بە بەشداری 130 سەرکردەی وڵاتانی جیهان کۆبوونەوەی خولی 81 گشتی کۆمەڵەی نەتەوەیەکگرتوەکان لە نیویۆرک دەست بەکارەکانی دەکات و ئاڵۆزییەکانی رۆژهەڵاتی ناوەڕاست و جەنگی ئۆکراین و روسیا و چارەسەرکردنی قەیرانەکان تاوتوێ دەکرێن.

کۆبوونەوەی ئەم خولەی رێکخراوەکە، لە رۆژی 18ی9ی2026وە دەستی پێکردووە و تا رۆژی 28ی مانگ بەردەوامی دەبێت کە لە ژێر دروشمی "گەڕانەوەی متمانە و بەڕێوەبردنی گۆڕانکارییەکان، نەتەوە یەکگرتووەکان بۆ خزمەتی گشتی"، بەڕێوەدەچێت.

 پەیوەست بە تەوەری سەرەکی کۆبوونەوەی ئەمساڵ،ئەوا کۆبوونەوەکە تاوتوێی ئاڵۆزییە سەربازییەکان و قەیرانە نێودەوڵەتییەکان دەکات بە تایبەت ئاڵۆزی و جەنگی رۆژهەڵاتی ناوەڕاست و جەنگی روسیا و ئۆکراین، ئەمە جگە لەوەی دانانی ژنێک وەک سکرتێری گشتیی داهاتووی ڕێکخراوەکە بووەتە تەوەری دانوستانە نهێنییەکان.

هەر لە کۆبوونەوەکاندا، چەندین تەوەری دیکە دەخرێنە بەر باس، لەوانە خستنەڕووی مەترسییەکانی گۆڕانی کەشوهەوا، بەرزبوونەوەی ئاستی ئاوی دەریاکان و پرسی دادپەروەری لە گواستنەوەی وزەدا، لەگەڵ تاوتوێکردنی هۆشدارییەکانی پەیوەست بە مەترسییەکانی گەشەسەندنی ژیریی دەستکرد لەسەر کۆمەڵگەی مرۆڤایەتی،ئەمە جگە لەوەی لێکۆڵینەوە لە هۆکارەکانی خاوبوونەوەی هەنگاوە ئابوورییەکان و ئامانجەکانی پلانی گەشەپێدانی بەردەوام بۆ ساڵی 2030 دەکرێت.

 ئەمەش لەکاتێکدایە، عەلی زەیدی سەرۆك وەزیرانی عیراق، بۆ بەشداریيكردن لە كۆبوونەوەكانی كۆمەڵەی گشتیی نەتەوە یەكگرتووەكان بەرەو نیویۆرک بەڕێکەوت و  بەپێی خشتەی سەردانەكەی، چاوی بە دۆناڵد ترەمپ، سەرۆكی ئەمریكا و سەرۆكی وڵاتانی دیکە دەكەوێت،هاوکات مەسعود پزیشکیان سەرۆککۆماری ئیسلامی ئێران و وەفدی باڵای ئەو وڵاتە بەشداری لە کۆبوونەوەکە دەکەن

PUKMEDIA