عیراق و فەرەنسا چەندین ڕێککەوتنی ستراتیژی ئیمزا دەکەن

نوسینگەی راگەیاندنی سەرۆکوەزیرانی عیراق

مەراسیمی ئیمزا کردنی رێککەوتنەکان

عه‌لی زه‌یدی سەرۆكوەزیرانی عیراق، له‌ پاریس له‌گه‌ڵ ئیمانوێل ماكرۆن سەرۆكی فەرەنسا، سه‌ر‌په‌ر‌شتی ئیمزاكردنی شەش ڕێککەوتن و یاداشتنی لێكتێگه‌یشتنیان كرد کە بوارەکانی وزە و ئابوری و کارەبا و سەربازی و خوێندن و کلتور لەخۆدەگرێت.

بە پێی راگەیەندراوی هاوبەشی هەردوو لایەن، لە کەرتی سەربازی و ئەمنیدا هەردوولا ڕێککەوتوون لەسەر بەردەوامیی هاوکارییەکان لە دوای کۆتاییهاتنی ئەرکی هاوپەیمانیی نێودەوڵەتی، لەنێویاندا پاراستنی سنوورەکان و دابینکردنی سەروەریی خاکی عیراق، هەروەها وەزارەتی بەرگریی عیراق لەگەڵ کۆمپانیای HARMATTAN AIی فەرەنسی لەسەر سیستەمی بەرگریی ئاسمانیی خۆکار رێککەوتنی ئیمزا کرد، ئەمە جگە لەوەی لەگەڵ کۆمپانیا فەرەنسییەکان لەسەر کڕینی سیستەمی دژەدرۆن، تۆپهاوێژ و چاودێری گەیشتووتنە لێکتێگەیشتن.

لە کەرتی ئابووری و وزەدا، حکومەتی عیراق و کۆمپانیای تۆتال ئینێرجیز یاداشتێکی لێکتێگەیشتنیان بۆ جێبەجێکردنی چەند پڕۆژەیەکی نوێی نەوت و کارەبا ئیمزا کرد، هاوکات لە کۆبوونەوەی50 نوێنەری کۆمپانیا گەورەکانی فەرەنسا لە مەکۆی ئابووریی پاریس، ئاژانسی گەشەپێدانی فەرەنسا (AFD) بەڵێنی بەردەوامیی پاڵپشتییە داراییەکانی بۆ عیراق نوێکردەوە، و لێکتێگەیشتنێکیش لە بواری گواستنەوەی ئاسمانی لەنێوان هەردوو وڵاتیشدا ئیمزا کرا.

هەر لە چوارچێوەی ڕێککەوتنەکاندا، پاریس پشتیوانیی خۆی بۆ پەرەپێدانی سینەمای نیشتمانیی عیراق و پاراستنی شوێنەوار و کەلەپوور ڕاگەیاند، بەتایبەت دوای کردنەوەی مۆزەخانەی موسڵ بە هەماهەنگی لەگەڵ مۆزەخانەی لۆڤەر.

هاوکات لە بواری خوێندنیشدا، هەردوولا لەسەر فراوانکردنی لیستی زانکۆ فەرەنسییەکان بۆ خوێندکارانی نێردراوی عیراق، و برەودان بە توێژینەوەکانی ژیریی دەستکرد ڕێککەوتن.

لە کۆتایشدا سەرۆکوەزیرانی عیراق، ستایشی حکومەتی فەرەنسای کرد لە کردنەوەی نەخۆشخانەی شەنگال.

PUKMEDIA