سەرۆكی فڕاكسیۆنی یەكێتی: موسڵ هەمیشە هێمای پێکەوەژیانی ئاشتییانە بووە

تایبەت

سەرۆکی فراکسیۆنی یەکێتی لە پارێزگای موسڵ

ئەمڕۆ 13ی9ی2026، هەرێم کەمال ئاغا سەرۆکی فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق سەردانی پارێزگای موسڵی کرد و لە دیدارەکانیشداجەختی لە هەماهەنگیی زیاتری نێوان نوێنەران و ئیدارەی خۆجێیی مووسڵ کرایەوە، بە ئامانجی خزمەتکردنی سەرجەم پێکهاتە ڕەسەنەکانی پارێزگاکە.

لە سەرەتای سەردانیدا، سەرۆکی فراکسیۆنی یەکێتی، سەردانی مەڵبەندی 7ی مووسڵی کرد، و پاشان بە هاوڕێیەتیی هەڤاڵ ئاراس محمد ئاغا، ئەندامی سەرکردایەتی و لێپرسراوی مەڵبەند، سەردانی دیوانی پارێزگا موسڵ- یان كرد لەلایەن عەبدولقادر دەخیل، پارێزگاری مووسڵەوە پێشوازیان لێکرا.

لەو دیدارەدا، هەرێم کەمال ئاغا وێرای دەستخۆشی لەو بەرەوپێشچوون و بوژانەوە بەرچاوەی پارێزگاکە، ستایشی هەنگاوە بوێر و کارە مەیدانییەکانی پارێزگار و تیمە کارگێڕییەکانی کرد لە پرۆسەی ئاوەدانکردنەوە و گێڕانەوەی سەقامگیریی زیاتر بۆ شارەکە،هەروەها جەخت لە هەماهەنگیی زیاتری نێوان نوێنەران و ئیدارەی خۆجێیی موسڵ کرایەوە، بە ئامانجی خزمەتکردنی سەرجەم پێکهاتە ڕەسەنەکانی پارێزگاکە.

هەر لە سەردانەکەیدا بۆ موسڵ، سەرۆکی فراکسیۆنی یەکێتی سەردانی ئەنجومەنی پارێزگای موسڵی کرد و لەلایەن ئەحمەد حاسود، سەرۆکی ئەنجومەنی پارێزگا و ئەندامانی ئەنجومەنەوە پێشوازیی لێکرا .

لەو کۆبوونەوەیەدا، تیشک خرایە سەر گرنگیی ڕۆڵی دەزگا چاودێری و یاساییەکان لە سەرخستنی کارە خزمەتگوزارییەکاندا، سەرۆکی فراکسیۆنی یەکێتی دووپاتیکردەوە کە موسڵ هەمیشە هێمای پێکەوەژیانی ئاشتییانە و برایەتی بووە.

لە کۆتایشدا، سەردانی دەستەی وەبەرهێنانی پارێزگای موسڵی کرد و لەلایەن حارس فارس، سەرۆکی دەستەی وەبەرهێنانەوە پێشوازی لێکرا و لەو دیدارەدا، باس لە پەرەپێدانی کەرتی وەبەرهێنان، ڕاکێشانی سەرمایەگوزاری کرا، بە جۆرێک کە خزمەت بە بووژانەوەی ئابوری و ڕەخساندنی هەلی کار لە شارەکەدا بکات .

PUKMEDIA