ململانێ سەربازییەكان لەگەروی هورمز تووندتر دەبن

PUKMEDIA

ململانێ سەربازییەكانی نێوان ئەمەریكا و ئێران

ململانێ سەربازییەكانی نێوان ئەمەریكا و ئێران لە گەروی هورمز و ناوچەكە گەیشتووەتە قۆناغێكی مەترسیدار، بە جۆرێك ئێران بۆ یەكەمجار پەنای بردووەتە بەر بەكارهێنانی مووشەكی بالیستی پێشكەوتوو بۆ هێرشكردنە سەر كەشتییە جەنگییەكانی ئەمەریكا، لەبەرامبەریشدا واشنتن وەڵامی توندی هێرشەكانی دایەوە.

دوای ئەوەی هێزەكانی ئێران چەند جارێك كەشتییە جەنگییەكانی ئەمەریكا، لەوانەش كەشتی فڕۆكە هەڵگر و هێزەكانی تری لە ئوردن، بە مووشەك كردووەتە ئامانج، سوپای ئەمەریكا رایگەیاند: سەرجەم هێرشەكان پووچەڵ كراونەتەوە و كەشتییەكان توانیویانە خۆیان لە پەلامارەكان بپارێزن، لە وەڵامیشدا هێزەكانی ئەمەریكا پێنج تانكەری نەوتی ئێرانیان لە نزیك گەروی هورمز و جزیرەی خارك تێكشكاند.

لە لایەكی دیكەوە، ئەم توندوتیژییە سەربازییە كاریگەریی راستەوخۆی لەسەر كەرتی بازرگانی و ئابووری دروستكردووەو هاتوچۆی كەشتییەكان لەگەروی هورمز بەڕێژەیەكی بەرچاو دابەزیوەو تەنها حەوت كەشتی توانیویانە تێپەڕن، لە كاتێكدا چەندین كەشتی بازرگانی دیكەش لە ناوچەكەدا كەوتوونەتە بەر هێرش و توندوتیژی و سوپای پاسدارانیش فراوانكردنی ناوچەی قەدەغەكراوی لە ناوچەكە راگەیاند.

هاوكات دۆناڵد ترەمپ، سەرۆكی ئەمەریكا رایگەیاند: كە پێشبینی دەكات ململانێكان دوای هەڵبژاردنەكانی نیوەی خول كۆتایی بێن، سەرەڕای ئەوەی ترەمپ جەخت لەسەركەوتن دەكاتەوە، بەڵام راوێژكارە باڵاكانی وەك جەی دی فانس و ماركۆ روبیو لە كۆبوونەوە داخراوەكاندا هۆشدارییان داوە كە ئەگەری درێژبوونەوەی ئەم ململانێیە بۆ ماوەیەكی درێژتر هەیە.

PUKMEDIA