وەفدێکی هەرێمی کوردستان بۆ رێککەوتن لەسەر بودجەی 2027 گەیشتە بەغدا

PUKMEDIA

لۆگۆی حکومەتی هەرێم و حکومەتی فیدڕاڵی

ئەمڕۆ 8ی9ی2026، وەفدێکی  هەرێمی کوردستان گەیشتە شاری بەغدا، بۆ ئەنجامدانی زنجیرەیەک کۆبوونەوە لەگەڵ وەزارەتە پەیوەندیدارەکانی حکومەتی فیدڕاڵ، ئامانجیش لە سەردانەکە بۆ گەیشتنە بە رێککەوتنێکی هاوبەش لەگەڵ حکومەتی فیدڕاڵ و جێگیرکردنی  شایستەکانی هەرێمی کوردستان لە بودجەی فیدڕاڵی ساڵی 2027دا.

بەپێی راگەیەندراوێکی فەرمانگەی میدیا و زانیاری، بڕیارە  وەفدەکە سەرەتا لەگەڵ وەزارەتی دارایی فیدڕاڵ و دواتریش لەگەڵ وەزارەتەکانی پلاندانان و نەوت کۆببێتەوە.

ئامانجی سەرەکیی سەردانەکە، بەشداریکردنی ڕاستەوخۆی حکومەتی هەرێمی کوردستانە لە ئامادەکردنی ڕەشنووسی پرۆژەیاسای بودجەی گشتیی فیدڕاڵ بۆ ساڵی داراییی 2027 و جێگیرکردنی پشک و شایستە دەستووری و داراییەکانی هەرێمی کوردستان لە پرۆژەیاساکەدا.

لە کۆبوونەوەکاندا، وەفدی حکومەتی هەرێم تێڕوانین و داواکارییەکانی هەرێمی کوردستان سەبارەت بە تەرخانکراوی مووچە و شایستە داراییەکانی مووچەخۆران و پلە و میلاکی وەزیفی، تەرخانکراوی پرۆژەکانی وەبەرهێنان و پەرەپێدانی پارێزگاکان، تەرخانکراوی بودجەی بەکاربردن و هەروەها دۆسیەی نەوت دەخاتەڕوو.

لە کۆتایشدا، فەرمانگەی میدیا و زانیاری ئامانجی سەردانی وەفدەکەی روونکردووەتەوە، کە بۆ گەیشتنە بە تێگەیشتن و ڕێککەوتنێکی هاوبەش لەگەڵ حکومەتی فیدڕاڵ و جێگیرکردنی ماف و شایستەکانی هەرێمی کوردستان لە بودجەی فیدڕاڵی ساڵی 2027دا.

PUKMEDIA