سێنتکۆم: گەرووی هورمز لە مین پاککرایەوە و هاتوچۆی کەشتیوانی ئاسایی بووەتەوە

میدیاکان

لۆگۆی سێنتکۆم

فەرماندەیی ناوەندیی هێزەکانی ئەمریکا (سێنتکۆم) ڕایگەیاند، پرۆسەی پاککردنەوەی گەرووی هورمز لە مینە چێنراوەکان بە سەرکەوتوویی کۆتایی هاتووە و لە ئێستادا ڕێڕەوی کەشتیوانیی کراوەیە.

براد کوپەر، فەرماندەی سێنتکۆم، ئاماژەی بەوە کرد کە کارەکە لە بارودۆخێکی زۆر سەخت و مەترسیداردا بەڕێوەچوو، بەڵام توانراوە ئەرکەکە بە تەواوی جێبەجێ بکرێت و لە ئەنجامدا هاتوچۆی دەریایی لە گەرووەکەدا کرایەوە و ڕووی لە زیادبوونیش کردووەتەوە.

کوپەر ئاشکرای کرد، لە ماوەی ڕابردوودا هاوکاری و پاراستنیان بۆ نزیکەی هەزار و 500 کەشتیی بازرگانی دابین کردووە کە هەڵگری نزیکەی 750 ملیۆن بەرمیل نەوتی خاو بوون لە گەرووی هورمزەوە.

ئاشکراشی کرد: ڕێگری لە 75 کەشتی کراوە و گەڕێندراونەتەوە کە هەوڵی شکاندنی گەمارۆی دەریایی بەندەرەکانی ئێرانیان دابوو.

فەرماندەی سێنتکۆم جەختی لەسەر بەردەوامیی ئامادەیی سەربازیی وڵاتەکەی کردەوە و ڕایگەیاند: بەشێکی زۆر لەو 50 هەزار سەربازەی لە ناوچەکە جێگیر کراون، ڕۆڵێکی گرنگ دەگێڕن لە پاراستنی هاتوچۆی بازرگانی لە ڕێگەی گەرووی هورمز و جێبەجێکردنی گەمارۆی دەریایی سەر ئێران.

 لە کۆتاییشدا دووپاتی کردەوە کە هێزەکانیان بە توانایەکی بەرزی بەرپەرچدانەوەوە لە ئامادەباشیی تەواودا دەمێننەوە.

PUKMEDIA