بوومەلەرزەیەکى بەهێز ئیندۆنیزیای هەژاند

CNN

وێنەیەکى دواى بوومەلەرزەکە

دوای ئەوەی بوومەلەرزەیەکی بەهێز بە گوڕی 7.7 پلە بە پێوەری رێختەر کەناراوەکانی رۆژهەڵاتی ئیندۆنیزیای هەژاند، ئاژانسە رەسمییەکان هۆشداریی تسۆنامییان راگەیاند و دانیشتووانی ناوچە کەناراوییەکانیان ناچار کرد بەرەو شوێنە بەرزەکان هەڵبێن، هاوکات بە پێی ئامارە سەرەتاییەکان گیانلەدەستدانی پێنج کەس پشتڕاستکراوەتەوە.

بوومەلەرزەیەکى بەهێز بەگوڕی 7.7 پلە بە پێوەری رێختەر کەناراوەکانی رۆژهەڵاتی ئیندۆنیزیای هەژاند و ئاژانسی کەشناسی هۆشداریی تسۆنامی بۆ دانیشتووانی دوورگەی فلۆرێس راگەیاند و ناوچە کەناراوییەکان چۆڵکران.

گیانلەدەستدانی پێنج کەس لە ناوچەکەدا پشتڕاستکراوەتەوە بەپێی ئامارە سەرەتاییەکان و چەندین پاشلەرزەی بەهێز کە گەورەترینیان 6.1 پلە بووە، ناوچە جیاوازەکانی ئەو وڵاتەیان هەژاندووە.

ئەم بوومەلەرزەیە کە لە قووڵاییەکی کەمدا روویداوە، دۆخی شڵەژانی لە بازاڕ و شوێنە گشتییەکان دروستکردووە و لەرزینێکی بەهێز لە دیوارەکانی نەخۆشخانەی شارۆچکەی ماومێرێی لە دوورگەی فلۆرێس روویداوە و دیوارەکان درزیان تێدا دروست بووە و بووەتە هۆی هەڵاتنی بەکۆمەڵی نەخۆشەکان، هەروەها دانیشتووانى ناوچەکە بەرەو شوێنە بەرزەکان رۆشتوون، هاوکات هەزاران کەسی ناچار کردووە لانیکەم دوو کیلۆمەتر بەرەو ناو وشکانی بڕۆن.

بێرتۆن سوار پێلیتا پانجایتان، وتەبێژی ئاژانسی رووداوە نەخوازراوەکانی ئەندۆنیزیا رایگەیاند: بۆ دیاریکردنی قەبارەی زیانە ماددى و گیانییەکان تیمەکانی فریاگوزاری لە پرۆسەی کۆکردنەوەی زانیاریدان و پاشلەرزەکان بەردەوامن.

ئاژانسی نیشتمانیی رووبەڕووبوونەوەی کارەساتەکان، رێنمایی بە دانیشتووانی باکووری فلۆرێس و دوورگەکانی دەوروبەری داوە، کە  بەزوویى ناوچە کەناراوییەکان چۆڵ بکەن و بچنە ئەو شوێنان و گردانەى بەرزییان لە 10 مەتر زیاترە و ئاستی ئاوی دەریا گۆڕانکاری بەسەردا هاتووە و لە نێوان 19 بۆ 30 سانتیمەتر شەپۆلەکان تۆمارکراون.

PUKMEDIA