سه‌رپه‌رشتیاری دارستانی چیای گۆیژه‌: رێگرده‌بین له‌مه‌ترسی ئاگركه‌وتنه‌وه‌

تایبەت

وێنەیەکى چیاى گۆیژە

چیای گۆیژه‌ له‌به‌رده‌م مه‌ترسیی ئاگركه‌وتنه‌وه‌دایه ‌و سه‌رپه‌رشتیاری دارستانی چیای گۆیژه‌ش چه‌ند پێشنیار و چاره‌سه‌رێك بۆ سه‌لامه‌تی دارستانه‌كه‌ ده‌خاته‌ڕوو، هه‌روه‌ها ده‌شڵێت:"پێویسته‌ لایه‌نه‌ په‌یوه‌ندیداره‌كان به‌ده‌نگمانه‌وه‌ بێن".

دارستانی چیای گۆیژه‌ی سلێمانی كه‌ رووبه‌ره‌كه‌ی 3 هه‌زار دۆنم زه‌وییه‌ ئێستا به‌ره‌و وه‌رزی وشكبوونی گژوگیا ده‌ڕ‌ۆین و دروستبوونی ئاگر سه‌رهه‌ڵده‌دات، سه‌رپه‌رشتیاری دارستانی چیای گۆیژه‌ چه‌ند پێشنیاز و چاره‌سه‌رێك و پێداویستییه‌كانی سه‌لامه‌تی دارستانه‌كه‌ی بۆ PUKMEDIA خسته‌ڕ‌وو.

ره‌ئوف بایزئاغا سه‌رپه‌رشتیاری پڕ‌ۆژه‌ی دارستانی چیای گۆیژه‌ به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: دارستانی گۆیژه‌ له‌به‌رده‌م مه‌ترسیی ئاگركه‌وتنه‌وه‌دایه‌، بۆیه‌ پێویستمان به‌خزمه‌تگوزاری و تیمی به‌رده‌وام هه‌یه‌ بۆ پاراستنی دارستانه‌كه‌.

راشیگه‌یاند: پڕ‌ۆژه‌ی دارستانی گۆیژه‌ كه‌ رووبه‌ره‌كه‌ی 3 هه‌زار دۆنم زه‌وییه‌، به‌هۆی سه‌ختیی شوێنه‌كه‌ و نه‌بوونی رێگای پێویست له‌كاتێكدا كه‌ ئاگر ده‌كه‌وێته‌وه‌ رێگریی گه‌وره‌ له‌به‌رده‌م تیمه‌كانی به‌رگری شارستانیدا دروستده‌بێت، چونكه‌ تیمه‌كان به‌هۆی نه‌بوونی رێگای گونجاو ناتوانن ئۆتۆمبێلی ئاگركوژێنه‌وه‌ هه‌تا سه‌ره‌وه ‌و قوڵایی دارستانه‌كه‌ ببه‌ن.

ره‌ئوف بایزئاغا سه‌رپه‌رشتیاری پڕ‌ۆژه‌ی دارستانی گۆیژه‌، چه‌ند خاڵێكی سه‌ره‌كی وه‌ك سه‌رچاوه‌ی مه‌ترسی و كه‌مكوڕ‌ی ده‌ستنیشان كرد، ئه‌وانیش نه‌بوونی په‌رژین و چاودێرییه‌ هه‌روه‌ها وتیشی: په‌رژین و ده‌رگاكانی په‌رژینه‌كه‌ شكاون، ئه‌مه‌ش وایكردووه‌ هاووڵاتییه‌كی زۆر به‌بێ سه‌رپه‌رشتی بچنه‌ ژووره‌وه ‌و ناوچه‌كه‌ پێویستییه‌كی به‌په‌له‌ی به‌چاودێریی به‌رده‌وام و پۆلیس هه‌یه‌، بۆ ئه‌وه‌ی له‌مه‌ترسی ئاگركه‌تنه‌وه‌ بپارێزرێت.

ئه‌وه‌شی خسته‌ڕ‌وو: شوێنی مه‌قه‌ڵییه‌كان زۆر نزیكن له‌ گژوگیا و په‌رژینه‌كه‌وه‌ و له‌ وه‌رزی وشكبوونی گژوگیادا، كاتێك گه‌شتیاران ئاگرده‌كه‌نه‌وه‌ ئه‌گه‌ری پریشكی ئاگر بۆ پووش و گیا وشكبووه‌كه‌ زۆره ‌و مه‌ترسی ئاگر كه‌وتنه‌وه‌ دروستده‌كات.

ناوبراو چه‌ند پێشنیاز و رێگاچاره‌یه‌كی بۆ پاراستنی ئه‌م سامانه‌ سروشتییه‌ گرنگه‌ی شاری سلێمانی خسته‌ڕوو و رایگه‌یاند: پێویسته‌ لایه‌نه‌ په‌یوه‌ندیداره‌كان به‌ده‌نگیانه‌وه‌ بچن و پێویسته‌ له‌ وه‌رزی گژوگیادا، ته‌نكه‌ری ئاو و ئۆتۆمبێلی ئاگركوژێنه‌وه‌ به‌شێوه‌ی هه‌میشه‌یی له‌وێ جێگیر بكرێن، هاوكات شه‌قامه‌كان فراوان بكرێن، بۆ ئه‌وه‌ی له‌كاتی ئاگركه‌وتنه‌وه‌دا تیمه‌كانی به‌رگری شارستانی بتوانن ئۆتۆمبێلی ئاگر گوژێنه‌وه‌ ببه‌نه‌ ناو قوڵایی و به‌شی سه‌ره‌وه‌ی دارستانه‌كه‌ی گۆیژه‌.

وه‌ك چاره‌سه‌رێكی ستراتیژیش ئاماژه‌ی به‌وه‌ كرد: پێشنیار ده‌كه‌ین كۆگایه‌كی گه‌وره‌ی ئاو له‌ به‌شه‌كانی سه‌ره‌وه‌ی گۆیژه‌ دروست بكرێت و له‌ رێگه‌ی تۆڕ‌ێكی بۆری ئاسنه‌وه‌ دابه‌شی دارستانه‌كه‌ بكرێت، بۆ ئه‌وه‌ی له‌كاتی سه‌رهه‌ڵدانی هه‌ر ئاگرێكدا به‌خێرایی بۆ كوژاندنه‌وه‌ی ئاگره‌كه‌ به‌كاربهێنرێت.

PUKMEDIA