نەناردنی داهاتی نانەوتی مووچە زیاتر دوادەخات

PUKMEDIA

دراوی عیراقی

چاوەڕواندەکرا ئەمڕۆ 6ی5ی2026، وەزارەتی دارایی هەرێم داهاتی نانەوتی بخاتە سەر هەژماری وەزارەتی دارایی فێدراڵی، بۆ ئەوەی عیراق مووچەی مانگی نیسانی مووچەخۆرانی هەرێم بنێرێت، بەڵام ئەمڕۆش داهاتە نانەوتییەکەی نەنارد و بەو هۆیەشەوە ئەوەندەی دیکە ناردنی مووچە دوادەکەوێت.

سروە محەمەد بڕیاردەری فراکسیۆنی یەکێتی لە ئەنجومەنی نوێنەرانی عیراق، بە PUKMEDIA ی راگەیاند: سێ مەرج بۆ ناردنی مووچەی مووچەخۆرانی هەرێم لەلایەن عیراقەوە هەیە، کە لە ئێستادا ناردنی نوسراوی وەزارەتی نەوت و ناردنی لیستی مووچە و تەرازووی پێداچوونەوە لەلایەن هەرێمەوە،رێکارەکانی تەواو بوون، بۆیە بۆ ناردنی مووچە تەنها ماوەتەوە هەرێم داهاتی نانەوتی بۆ بەغدا بنێرێت.

 راشیگەیاند: بەپێی بەدواداچوونەکانم، وەزارەتی دارایی عیراق، وەک مانگەکانی رابردووتر، مەرجی ناردنی 120 ملیار دیناری وەک داهاتی نانەوتی بۆ هەرێم نییە، بەڵام حکومەتی هەرێم، تا ئێستا هیچ بڕە پارەیەکی وەک داهاتی نانەوتی بۆ بەغدا نەناردووە، ئەمەش ناردنی مووچەی پەکخستووە.

 بەپێی زانیارییەکانی PUKMEDIA ، هەرچەندە پێشتر مەرجی ناردنی مووچە، لەلایەن وەزارەتی داراییەوە، ناردنی 120 ملیار دینار وەک داهاتی نانەوتی بووە، بەڵام بەهۆی ئەو ئاڵۆزییەی کە لە ناوچەکەدا هەبووە، لە ماوەی دوو مانگی رابردوودا، وەزارەتی دارایی عیراق چاوپۆشی لەو مەرجە کردووە و بۆ مانگی رابردوو، حکومەتی هەرێم تەنها بڕی 43 ملیار دیناری وەک داهاتی نانەوتی بۆ عیراق ناردووە.

 پەیامنێرمان لە بەغداد رایگەیاند:  وەزارەتی دارایی عیراق چاوەڕوانی ناردنی داهاتی نانەوتی هەرێمە، بۆ ناردنی مووچە،کە بەپێی زانیارییە نارەسمییەکان، بۆ ئەم مانگە حکومەتی هەرێم، لە توانایدا بڕی 54 ملیار دینار وەک داهاتی نانەوتی بۆ عیراق بنێرێت، لەکاتێکدا بۆ مانگی رابردوو تەنها 43 ملیار دیناری ناردبوو.

ئەمەش لەکاتێکدایە، ر‌ۆژی 12ی 4ی 2026 دابه‌شكردنی مووچه‌ی مانگی ئازاری مووچه‌خۆرانی هه‌رێم دابه‌شكرا و رۆژی 14ی4ی2026 كۆتایی به‌دابه‌شكردنی مووچه‌ هات.

PUKMEDIA