ئابووری سیستمی حكومڕانی لەهەرێمی كوردستان دەگۆڕێت

ميدياكان

هەولێر

لەگەڵ ئەوەی 18 مانگە هەڵبژاردنی پەرلەمانی كوردستان ئەنجامدراوە، بەڵام تائێستا حكومەتی نوێی هەرێم پێكنەهێنراوەو لایەنەكانیش هەر لەگفتوگۆدان، چاودێرێكی سیاسیش دەڵێت: بارودۆخی ئابووری كاریگەری زۆری لەسیستمی وڵاتان هەیەو بۆ هەرێمی كوردستانیش ئەو هاوكێشەیە راستە، هەربۆیە تائێستا نەتوانراوە حكومەتی نوێی هەرێمی كوردستان پێكبهێندرێت.

د.موسلیم عەبدولتاڵاس، مامۆستای زانكۆ و چاودێری سیاسی نێودەوڵەتی لەوتارێكدا ئاماژە بۆ ئەوەدەكات: ئەوەی ئەمڕ‌ۆ لەهەرێمی كوردستان دەگوزەرێت ئاماژەیە بۆ كێشەیەكی قووڵتر، ڕەنگە سیستمی سیاسی خۆی توانای ئەنجامی هەڵبژاردن بۆ دەسەڵاتی حوكمڕ‌انی نەمابێت و بڕیاری یەكلاكەرەوە لای لایەنەكان بێت.

ئاماژە بۆ ئەوەشدەكات: پێناچێت دواكەوتنی حكومەتی هەرێمی كوردستان قەیرانێكی دانوستانی ئاسایی بێت لەنێوان لایەنەكاندا، بەڵكو چاوەڕوان دەكرێت كاریگەری ئەو بارودۆخە بێت كە لەناوچەكەدا هەیە، بەتایبەت بارودۆخی سیاسی و ئابووری.

ئەو چاودێرە ئەوەشدەخاتەڕوو: ئەنجامەكانی هەڵبژاردنەكانی ساڵی 2024 لەهەرێمی كوردستان هەر ئەنجامێكی ژمارەیی نەبوو، بەڵكو هاوسەنگی هێزی گۆڕی و سیستمی سیاسیش تائێستا نەیتوانیوە خۆی لەگەڵ ئەو گۆڕانكارییە بگونجێنێت و كێشەی نێوان لایەنەكان چارەسەر بكات، هەر ئەمەشە وایكردوە ناكۆكی لایەنەكانی هەرێمی كوردستان بەتایبەت یەكێتی و پارتی تەنها لەهەولێر و سلێمانی نەمێنێتەوەو ناكۆكییەكانیان لەبەغداد و كەركوكیش بڕوات.

PUKMEDIA