گۆڕینەوەی دووهەزار دۆلار بۆ حاجییان بە نرخی بانکی ناوەندی دەستپێدەکات

میدیاکان

حاجیانی هەرێمی کوردستان

لە ئەمڕۆوە ئەو کەسانەی ناویان بۆ حەج گەڕاوەتەوە، دەتوانن بچن دۆلار بە نرخی بانکی ناوەندی وەربگرن، وتەبێژی بەڕێوەبەرایەتیی حەج و عومرەی هەرێمی کوردستانیش رایدەگەیەنێت: هەر حاجییەک دەتوانێت دووهەزار دۆلار وەربگرێت.

کاروان ستوونی، وتەبێژی بەڕێوەبەرایەتیی حەج و عومرەی هەرێمی کوردستان، بە PUKMEDIA ی راگەیاند: لە ئەمڕۆوە ئەو کەسانەی ناویان بۆ حەج گەڕاوەتەوە دەتوانن بچن دۆلار بە نرخی بانکی ناوەندی وەربگرن.

لە بارەی پێداویستییەکانیشەوە، کاروان ستونی ئاماژەی بەوەکرد: هەر کەسێک دەچێت بۆ وەرگرتنی دۆلار بە نرخی بانکی ناوەندیی دەبێت (پاسپۆرت و ڤیزەی حەج - دوو ملیۆن و 665 هەزار دیناری عیراقی) پێبێت

روونیشی کردەوە: لە بانکی جیهان و نووسینگەکانی ئاڵوگۆڕی دراو لە جۆرەکانی (A-B) حاجییەکان دەتوانن دووهەزار دۆلار وەربگرن، کە ئەمەیش هاوکارییەکی باشە بۆ حاجیان، چونکە هەر حاجییەک زیاتر لە ٤٥٠ هەزار دینار سوودی هەیە.

وتەبێژی حەج و عومرەی هەرێمی کوردستان لە بارەی دابینکردنی فڕۆکە بۆ حاجیان رایگەیاند: توانیمان بۆ ئاسانکاریی حاجییانی هەرێمی کوردستان فڕۆکەیان بۆ دابینبکەین، کە لە دەروازەی عەرعەرەوە بیانگەیێنێتە شاری جەددە لە سعودیە.

لە کۆتایشدا، کاروان ستوونی وتەبێژی بەڕێوەبەرایەتیی حەج و عومرەی هەرێمی کوردستان، رایگەیاند: زۆرینەی کاری حاجییان تەواو کراوە و ئامادەکارییەکان بۆ دەستپێکردنی گەشتەکان لەکۆتاییدان.

PUKMEDIA