كەركوك یەكڕیزی دەوێت یان دوو روویی؟

ميدياكان

سەردانی وەفدی پارتی بۆلای پارێزگارە توركمانەكەی كەركوك

ئەمڕۆ وەفدێكی پارتی دیموكراتی كوردستان، بەچەپكە گوڵێكی زەردەوە، پیرۆزباییان پێشكەش بەپارێزگارە توركمانەكەی كەركوك كرد، لەكاتێكدا لەماوەی یەك ساڵ و هەشت مانگی رابردوودا كە پارێزگارێكی كورد لەكەركوك بوو ئەو هەڵوێستەیان نەنواند.

پارتی دیموكراتی كوردستان، كە هەمیشە ئیدیعای یەك هەڵوێستی و یەكدەنگی كورد لە عیراق و ناوچە جێناكۆكەكان دەكات، بەڵام بەكردار تەواو پێچەوانەی وتەكانیان كار دەكەن، بەجۆرێك كاتێك داوای یەكهەڵوێستی كورد لەناوچە جێناكۆكەكان دەكەن، بەڵام لەماوەی ساڵێك و هەشت مانگی رابردوودا كە رێبوار تەها پارێزگاری كەركوك بوو، ئامادە نەبوون لەپێناو خەڵكی كەركوك و ئەو یەكڕیزییەی باسی لێوەدەكەن سەردانی پارێزگارە كوردەكە بكەن، لەكاتێكدا رێبوار تەها چەندین جار دەستپێشخەریی بۆ سەردانیكردن و یەكتر بینین كردووە.

بەڵام لەدوای چەند رۆژێكی كەم لەدەستبەكاربوونی محەمەد سەمعان بەپارێزگاری كەركوك، وەك یەكەم لایەنی كوردستانی خۆیان گەیاندە بینای پارێزگاو بەچەپكە گوڵێكی زەردەوە دەیانەوێت هەڵوێستی چەند رۆژی رابردوویان لەبارەی دەستبەكاربوونی پارێزگارێكی توركمان بۆ كەركوك بسڕنەوە، ئەمەش دوو فاقی و دوو روویی و چەواشەكارییانی زیاتر دەرخست.

 PUKMEDIA