ڕفعەت عەبدوڵا: یەکێتی پەرۆشی فەراهەمکردنی ئازادییە بۆ رۆژنامەنووسان

PUKMEDIA

یادی رۆژنامەگەری کوردی

ڕفعەت عەبدوڵا جێگری سەرۆکی یەکێتیی نیشتمانیی کوردستان، لەساڵیادی رۆژنامەگەری کوردییدا پەیامێکی پیرۆزبایی ئاڕاستەی رۆژنامەنووسان دەکات و رایدەگەیەنێت: یەکێتیی نیشتمانیی کوردستان هەمیشە پەرۆشی پاراستن و دابینکردنی ژینگەیەکی لەبارە بۆ رۆژنامەنووسان و فەراهەمکردنی ئازادی ڕادەربڕین و میدیایی.

لەساڵیادی ڕۆژنامەگەری کوردییدا جوانترین پیرۆزبایی لەسەرجەم ڕۆژنامەنوسان و میدیاکارانی ڕەوتی پڕ ڕێبواری ڕۆژنامەنوسی کوردی دەکەم و هیوادارم بەگەیاندنی پەیامی دروست و پیشەییانە، ڕۆڵێکی کاریگەرتر لەگەشەپێدانی کۆمەڵایەتی و سیاسی و فەرهەنگی کوردستاندا ببینن.

دەرچوونی یەکەم رۆژنامەی کوردی مانایەکی گەورەی هەیە کەدروستبوونی خواستێکی مێژووییە بۆ دامەزراندنی شوناسێکی نەتەوەیی و وشیارییەکی یەکگرتوو، تالەم ڕێگایەوە داکۆکیەکی زیاتر لەمافەکانی گەلەکەمان بکرێت.

ئومێدەوارم رۆژنامەنووس و میدیای کوردی بەگشتی، پابەندبێت بەئیتیک و ئەخلاقیاتی کاری رۆژنامەنووسی، دووربکەوێتەوە لەناوزڕاندن و هەڵبەستنی هەواڵی نادروست و هەڵپەکردن بۆ بازاڕگەرمی بینەرو خوێنەر.

 یەکێتیی نیشتمانیی کوردستان هەمیشە پەرۆشی پاراستن و دابینکردنی ژینگەیەکی لەبارە بۆ ڕۆژنامەنوسان و فەراهەمکردنی ئازادی رادەربڕین و میدیایی.

دروود بۆ گیانی پاکی ڕۆژنامەنووسە شەهیدەکان و ڕۆژنامەوانە پێشەنگەکان

ڕفعەت عەبدوڵا
جێگری سەرۆکی یەکێتیی نیشتمانیی کوردستان

PUKMEDIA