پارێزگاری كه‌ركوك: وه‌ك رێبوار ته‌ها خزمه‌تی هه‌موو پێكهاته‌كان ده‌كه‌ین

راگەیاندنی پارێزگای کەرکوک

محەمەد سەمعان، پاریزگاری کەرکوک

پارێزگاری کەرکوک باس لە کارەکانی رێبوار تەها دەکات و دەڵێت: بەردەوام دەبین لەسەر رێڕەوی کارکردنی  پارێزگاری پێشووی کەرکوک، کە توانی پێکەوە ژیان و ئارامی لەکەرکوک زیندوو بکاتەوە.

محەمەد سەمعان پارێزگاری کەرکوک پاش دەستبەکاربونی لە کۆنگرەیەکی رۆژنامەوانیدا رایگەیاند: درێژە پێدەری کارەکانی رێبوار تەها پارێزگاری پێشووی کەرکوک دەبین و بێ جیاوازی خزمەتی سەرجەم پێکهاتەکانی شاری کەرکوک دەکەین، چونکە بە ئامانەتەوە پارێزگاری پێشوو زۆر بە دڵسۆزانەو بێ جیاوازی کاری کردووە.

وتیشی: رێبوار تەها توانی ئارامی و سەقامگیری بۆ کەرکوک بگەڕێنێتەوە، هەروەها توانی پێکەوە ژیانی پێکهاتەکان لەناو کەرکوک زیندوو بکاتەوە، بۆیە ئێمەش لەسەر ئەو رێبازەی بەردەوام دەبین.

ئەوەشیخستەروو: رێبوار تەها بێ جیاوازی خزمەتی سەرجەم پێکهاتەکانی کەرکوکی دەکرد و فێری کردین کە ئێمەش بەو شێوەیە کاربکەین، بۆیە منیش جیاوازی ناکەم و سەردانی هەموو ناوچەکان دەکەم و دەستی خزمەتگوزاری زیاتریان پێدەگەیەنم.

رێبوار تەها پارێزگاری پێشووی کەرکوک، کە ماوەی ساڵێک و 8 مانگ لەو پۆستەدا مایەوە، توانی خزمەتێکی زۆر بە خەڵکی کەرکوک بەبێ جیاوازی بکات و چەندین پرۆژەی خزمەتگوزاری بگەیەنێتە ناوچەکانی کەرکوک، لەکاتێکدا کەتەنها پارەی پترۆ دۆلار لەبەردەست بووە بۆ خزمەتکردنی شارەکە، کە بەراورد بە پارێزگارەکانی پێشوو کەمتر 10٪ی ئەو بودجەیەی لەبەردەستی ئەواندا بووە، لەبەردەست رێبوار تەهادا بووە، هاوکات لەو ماوەیەدا کە پارێزگاری شارەکە و سەرۆکی لیژنەی ئەمنی بووە، توانیویەتی ئارامی زیاتر بۆ شارەکە بگەڕێنێتەوەو چەندین هەوڵی تیرۆرستی پووچەڵ بکاتەوە.

PUKMEDIA