مەکتەبى سیاسى: سەرۆك مام جەلال كۆكەرەوەی هێز و لایەنە سیاسییەكان بوو

PUKMEDIA

لۆگۆی یەکێتيی نیشتمانیی كوردستان

ئەمڕۆ6 ى نیسان مەکتەبی سیاسیی یەکێتیی نیشتمانیی کوردستان پەیامێکى بڵاوکردەوە و ئاماژەى بە ئەوەدا: لە رۆژی شەشی نیسانی ساڵی 2005دا بۆیەكەمجار لە مێژووی عیراقدا و لە رێگەی هەڵبژاردنەوە مام جەلال  وەك كوردێك  و یەکەم پێشمەرگە بووە سەرۆك كۆماری عیراق، سەرۆك مام جەلال وێڕای ئەركە رەسمیەكانی لە كایەی دیبلۆماسی و لە كۆڕ و كۆبوونەوە نێودەوڵەتیەكاندا، لەناوخۆی وڵاتدا كۆكەرەوەی  گشت هێز و لایەنە سیاسییەكانی عیراق بوو هەر بۆیە ناونرابوو ( صمام  الامان).

دەقى پەیامەکە:

پەیامی مەکتەبی سیاسیی بۆ بیرەوەری یەکەمین جار هەڵبژاردنی سەرۆک مام جەلال

لە دوای روخانی رژێمی دیكتاتۆری، رۆژی شەشی نیسان بووە رۆژێكی پرشنگدار لە مێژووی عێراقی  نوێدا، بیست و یەك ساڵ لەمەوبەر بۆ یەكەمجار و لە رێی هەڵبژاردنەوە سەرۆك كۆماری عێراق دیاری كرا.

لە رۆژی شەشی نیسانی ساڵی 2005دا بۆ یەكەمجار لە مێژووی عێراقدا و لە رێگەی هەڵبژاردنەوە مام جەلال وەك كوردێك و یەکەم پێشمەرگە بووە سەرۆك كۆماری عێراق .

هەڵبژاردنی سەرۆك مام جەلال بووە جێگەی هیوا و ئومێد بۆ گشت عێراقییەكان بە كورد و عەرەب و گشت  پێكهاتە نەتەوەیی و ئایینەكانی ترەوە، لە ماوەی  سەرۆكایەتی ئەودا عێراق وێڕای  ئەو هەڕەشانەی  لە سەری  بوو، بەڵام  بە سیاسەتە حەكیمانەكەی توانی نەهێڵێت ئەو هەڕەشە و مەترسییانە عێراقی نوێ تێكبدات.

سەرۆك مام جەلال وێڕای ئەركە رەسمیەكانی لە كایەی دیبلۆماسی و لە كۆڕ و كۆبوونەوە نێودەوڵەتیەكاندا، لەناوخۆی وڵاتدا كۆكەرەوەی گشت هێز و لایەنە سیاسییەكانی عێراق بوو، هەر بۆیە ناونرابوو ( صمام  الامان).

لەو رۆژەوە تا ساتی نەخۆشكەوتنی سەرۆك مام جەلال، كۆماری عێراق لە قۆناغی بەجێهێشتنی  دیكتاتۆریەوە چووە ناو قۆناغی  دیموكراسی  و ئازادی و هەڵبژاردنەوە، كە یەكەمجار بوو ئەم  وڵاتە  قۆناغی  وا  بەخۆیەوە ببینێت.

سەرۆك مام جەلال بۆ چارەسەری گشت پرسە نیشتمانی و نێودەوڵەتییەكان، بۆ كردنەوەی هەر گرێیەك، بەردەوامیدان بە گفتوگۆ و لێكتێگەیشتنی كردبووە تەنها  بژاردە و دژی هەر جۆرە ئاڵۆزی و گرژیەك بوو، ئەمەشی كردبووە بناغەی كۆكەرەوەی  گشت  هێز و لایەنە عێراقییەكان و راگرتنی هاوسەنگی پەیوەندییە نێودەوڵەتییەكان.

بۆیە بۆ تێپەڕینی ئەم  قۆناغەی  كە ئێستا عێراقی  تێدایە و وێڕای ناكۆكییە  ناوخۆییەكان، چەند هەڕەشەی  دەرەكیش بوونەتە مەترسی بە سەر وڵات و خەڵكەكەیەوە، هەموومان گشت هێز و لایەنە عێراقییەكان   پێویستمان بەوەیە كە بگەڕێینەوە بۆ پشت بە ستن بە سیاسەتی حەكیمانەی سەرۆك مام جەلال  بۆ مامەڵەكردن لەگەڵ ئەم  بارودۆخەدا.

ئەم یادە لە هەمووان پیرۆزبێت و هەمیشە ئیلهام بەخشە بۆ سەرخستنی پڕۆژەی وڵاتێکی دیموکرات و فیدراڵ کە شەراکەت و پێکەوەیی باڵادەست بێت.
 
مەکتەبی سیاسیی
یەکێتیی نیشتمانیی کوردستان

PUKMEDIA