نەتەوەیەکگرتووەکان دەنگ لەسەر پرۆژەیاسایەک بۆ پاراستنی گەرووی هورمز دەدات

PUKMEDIA

گەرووی هورمز

ئەنجومەنی ئاسایشی نەتەوە یەکگرتووەکان دەنگ لەسەر پڕۆژە یاسایەکی بەحرەین بۆ پاراستنی گەرووی هورمز دەدات، چین-یش وەک ئەندامێکی هەمیشەیی خاوەن مافی ڤیتۆ دژایەتی خۆی بۆ هەر مۆڵەتێکی بەکارهێنانی هێز دەردەبڕێت.

ئەمڕۆ 3ی4ی2026 دیپلۆماتکارانی نەتەوەیەکگرتووەکان رایانگەیاند: چاوەڕواندەکرێت ئەنجومەنی ئاسایشی نەتەوە یەکگرتووەکان دەنگ لەسەر پڕۆژە یاسایەکی پێشنیارکراوی بەحرەین بدات، کە ئامانجی پاراستنی کەشتیوانی بازرگانییە لە گەرووی هورمز و دەوروبەری و چین-یش وەک ئەندامێکی هەمیشەیی خاوەن مافی ڤیتۆ دژایەتی خۆی بۆ هەر مۆڵەتێکی بەکارهێنانی هێز دەربڕیوە.

بەپێی هەواڵێکی ئاژانسی رۆیتەرز، دوو دیپلۆماتکار پشتڕاستییان کردەوە کە کۆبوونەوەی 15 ئەندامەکەی ئەنجومەن و پرۆسەی دەنگدانەکە بۆ سبەینێ ڕۆژی شەممە دیاریکراوە و بەحرەین کە سەرۆکایەتی ئێستای ئەنجومەنی ئاسایش دەکات، رەشنووسی بڕیارەکەی کۆتایی پێهێناوە کەڕێگە بە بەکارهێنانی "هەموو ئامرازە بەرگرییە پێویستەکان" دەدات بۆ پاراستنی کەشتیوانی بازرگانی و پێشنیاری ئەوە دەکات ئەم ڕێکارانە بۆ ماوەی "لانی کەم شەش مانگ" بەردەوام بن، تا ئەو کاتەی ئەنجومەن بڕیارێکی تر دەدات.

سەرەڕای ئەوەی بەحرەین کە لەلایەن وڵاتانی کەنداو و ئەمریکاوە پشتگیری دەکرێت، پێشتر هەندێک دەستەواژەی پەیوەست بە "سەپاندنی زۆرەملێی بڕیارەکە"ی لادابوو، بۆ ڕەواندنەوەی نیگەرانییەکانی ڕووسیا و چین، بەڵام باڵیۆزی چین لە نەتەوە یەکگرتووەکان، هۆشداری دا کە ڕێگەدان بە بەکارهێنانی هێز دەبێتە هۆی "شەرعیەتدان بە بەکارهێنانی نایاسایی و ناڕەوای هێز"، ئەمەش بارودۆخەکە ئاڵۆزتر دەکات و دەرەنجامی مەترسیداری دەبێت، هاوکات دۆناڵد ترەمپ سەرۆکی ئەمریکا بەڵێنی بەردەوامبوونی هێرشە سەربازییەکانی داوە، بەبێ ئەوەی پلانێکی ڕوون بۆ کردنەوەی گەرووەکە بخاتە ڕوو، ئەمەش نیگەرانییەکانی لەبارەی دابینکردنی ئاسایشی وزە زیاتر کردووە.

ئەمش لەکاتێکدایە، پاش ئەوەی ئەمریکا و ئیسرائیل لە کۆتایی مانگی شوباتدا هێرشیان کردە سەر ئێران نرخی نەوت بە شێوەیەکی بەرچاو بەرزبووەوە و ململانێکان بووەتە هۆی داخرانی ئەم ڕێڕەوە دەریاییە ستراتیژییە گرنگە.

PUKMEDIA