ئاماری شه‌هیدو برینداره‌كانی هێرشه‌كانی سه‌ر هه‌رێمی كوردستان

PUKMEDIA

هێرشی درۆنی بۆ سەر هەرێمی کوردستان

به‌هۆی ئه‌و هێرشانه‌ی ده‌كرێنه‌ سه‌ر هه‌رێمی كوردستان، تاوه‌كو ئێستا 13 كه‌س شه‌هید بوون و زیاتر له‌ 50 كه‌سی دیكه‌ش بریندار بوون.

 ئاماری شه‌هیده‌كان

به‌هۆی هێرشێكی درۆنی بۆ سه‌ر فڕ‌ۆكه‌خانه‌ی نێوده‌وڵه‌تی هه‌ولێر  لە رۆژی 7ی3ی2026،كارمه‌ندێكی ئاسایش شه‌هید بوو، هاوكات به‌پێی ئاماره‌ ناڕه‌سمییه‌كان به‌هۆی هێرشه‌كانه‌وه‌ بۆ سه‌ر پارته‌كانی رۆژهه‌ڵاتی كوردستان، تاوه‌كو ئێستا پێنج ئه‌ندامیان شه‌هیدبوون.

له‌لایه‌كی دیكه‌وه‌، له‌هێرشێکی رۆژی 12ی3ی2026 بۆ سه‌ر بنكه‌یه‌كی هێزه‌كانی فه‌ڕ‌ه‌نسا له‌ مه‌لا قه‌ره‌ له‌ سنووری هه‌ولێر، سه‌ربازێكی ئه‌و وڵاته‌ كوژرا. 

هه‌روه‌ها له‌ دوایین هێرشیشدا كه‌ رۆژی 24ی3ی2026، ئه‌نجامدرا ،به‌پێی راگه‌یه‌ندراوێكی وه‌زاره‌تی پێشمه‌رگه‌،" له‌ دوو هێرشی مووشه‌كیدا بۆ سه‌ر دوو پێگه‌ی هێزه‌كانی پێشمه‌رگه‌ له‌ به‌نی هه‌ریر له‌سنووری ئیداره‌ی سه‌ربه‌خۆی سۆران، شه‌ش پێشمه‌رگه‌ شه‌هیدبوون، به‌مه‌ش ژماره‌ی شه‌هیده‌كان بۆ 13 شه‌هید به‌رزبووه‌وه‌.

ئاماری برینداره‌كان

هه‌ر به‌هۆی هێرشه‌كه‌ی سه‌ر فڕ‌ۆكه‌خانه‌ی هه‌ولێر، سێ كارمه‌ندی ئاسایش بریندار بوون، هه‌روه‌ها به‌هۆی هێرشه‌كان بۆ سه‌ر پێگه‌ی پارته‌كانی رۆژهه‌ڵاتی كوردستان، تاوه‌كو ئێستا 20 ئه‌ندامیان بریندار بوون.

هاوكات له‌ دواین هێرشیشدا كه‌ بۆ سه‌ر دوو پێگه‌ی هێزی پێشمه‌رگه‌ی كوردستان ئه‌نجامدرا 30 پێشمه‌رگه‌ بریندار بوون، كه‌به‌كۆی گشتی برینداره‌كان 53 بریندار ده‌كات.

 ئه‌مه‌ش له‌كاتێكدایه‌، هه‌ر له‌ دوای ده‌ستپێكردنه‌وه‌ی جه‌نگی نێوان ئه‌مریكا و ئیسرائیل دژ به‌ ئێران له‌ 28ی2ی2026وه‌، بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان چه‌ندینجار ته‌ئكیدی كردوه‌ته‌وه‌ كه‌،" هیچ كاتێك هه‌رێمی كوردستان به‌شێك نابێت له‌م جه‌نگه‌، به‌ڵكو هه‌وڵه‌ دیپلۆماسییه‌كانمان خستووه‌ته‌گه‌ڕ‌ تاوه‌كو به‌شێكبین له‌ دۆزینه‌وه‌ی چاره‌سه‌ری ئاشتییانه‌ له‌ رێگه‌ی گفتوگۆوه‌ تاوه‌كو سه‌قامگیریی بۆ ناوچه‌كه‌ بگه‌ڕ‌ێته‌وه‌، هه‌روه‌ها حكومه‌تی هه‌رێمی كوردستانیش دووپاتی كردووه‌ته‌وه‌، به‌شێك نییه‌و نابێت له‌و جه‌نگه‌، به‌ڵكو مه‌به‌ستییه‌تی له‌رێگای دیپلۆماسییه‌وه‌ كێشه‌كان چاره‌سه‌ر بكات.


PUKMEDIA