موەلیدە ئەهلییەکان دەکەونەوە کار

PUKMEDIA

موەلیدە ئەهلییەکان

لەسنوری پارێزگای سلێمانی خشتەیەكی نوێ بۆ كارپێكردنی موەلیدە ئەهلییەکان دانرا و تا ئاسایی بوونەوەی دۆخی کارەبای نیشتمانیی کاری پێدەکرێت.

لەڕاگەیەنراوێکدا ئەنجومەنی موەلیدە ئەهلییەکانی شاری سلێمانی رایگەیاند: لە ئێوارەی ئەمڕۆوە 3ی3ی2026موەلیدەكانی سلێمانی، لە دوو كاتی جیادا كارەبا بۆ هاووڵاتیان دابین دەكەن.

بەپێی خشتەیەک کە دانراوە، لەسەعات 4:00ی ئێوارە تا 12:00ی شەو موەلیدەكە ئەهلییەكان كارەبا بۆ هاووڵاتیان دابین دەكەن و هاوكات بۆ ڕەچاوكردنی كاتی پارشێو لە سەعات 3:30ی بەرەبەیان تا سەعات 5:00ی بەیانی كارەبا دەدەنەوە بە هاووڵاتیان.

هاوکات فازل عومەر قائیمقامی سلێمانی بە وەکالەت لەکۆنگرەیەکی رۆژنامەوانیدا  رایگەیاند: دوای کۆبوونەوەمان لەگەڵ کۆمەڵەی مۆلیدە ئەهلییەکانی سلێمانی بڕیاردرا رۆژانە لە سەعات 4ی ئێوارە بۆ سەعات 1ی شەو کارەبا بدەن بە هاووڵاتیان.

ئەمەش لەکاتێکدایە، لە شەوی رابردووەوە  موەلیدە ئەهلییەکان لە شاری هەولێر دەستییان بە کارکردن و پێدانی کارەبا بە هاووڵاتییان کردووەتەوە و ئەمڕۆش لەسلێمانی بڕیاری کارپێکردنەوەی موەلیدەکان درا.

لە چەند رۆژی رابردوودا بەهۆی هێرشەکانی ئێرانەوە کۆمپانیای دانەگاز گازی سروشتى بۆ وێستگەکانى کارەبای هەرێم کەمکردەوە، بەوەش کارەبای 24 سەعاتی بۆ چەند سەعاتێک کەمکرایەوە.

PUKMEDIA