فڕۆکەخانەی سلێمانی لە 19ی3وە دەبێتە فڕۆکەخانەی نێودەوڵەتی جەلال تاڵەبانی

PUKMEDIA

فڕۆکەخانەی نێودەوڵەتی جەلال تاڵەبانی

لە رێکەوتى 19ى ئازارى 2026، ناوى "فڕۆکەخانەی نێودەوڵەتیی سلێمانی" بۆ ناوی "فڕۆکەخانەی نێودەوڵەتیی جەلال تاڵەبانی" دەگۆڕێت و ناوی نوێ لە سەرجەم نووسراوە رەسمییەکان، نەخشە، گەشتە ئاسمانییەکان و بەڵگەنامە پەسەندکراوە پەیوەندیدارەکاندا جێگیر دەکرێت.

دامەزراوەى سەرۆک جەلال تاڵەبانى، لە راگەیەنراوێکدا رایگەیاند: دەسەڵاتی فڕۆکەوانیی شارستانیی عیراق بە رەسمی بڕیاریدا ناوی "فڕۆکەخانەی نێودەوڵەتیی جەلال تاڵەبانی" لە جیاتی "فڕۆکەخانەی نێودەوڵەتیی سلێمانی" جێگیر بکرێت، ئەمەش بەپێی ئەو هەموارەی  لەلایەن دەسەڵاتی فڕۆکەوانیی شارستانیی عیراقەوە لە چوارچێوەی بڵاوکراوەی زانیارییەکانی فڕۆکەوانیدا (AIP Amendment) دەرچووە.

لە راگەیەنراوەکەدا هاتووە: بڕیاری گۆڕینی ناوەکە لە 19ی ئازارى 2026ەوە دەچێتە بواری جێبەجێکردنەوە، تێیدا ناوی نوێ لە سەرجەم نووسراوە رەسمییەکان، نەخشە، گەشتە ئاسمانییەکان و بەڵگەنامە پەسەندکراوە پەیوەندیدارەکاندا جێگیر دەکرێت.

ئاماژە بە ئەوەش دراوە: ئەم رێکارە لە چوارچێوەی ئەو نوێکارییە رەسمییانەدایە لە کەرتی فڕۆکەوانیی شارستانیی عیراقدا پەسەند کراون، کە هەموارکردنی کۆد، نیشانە و زانیارییە تەکنیکییەکانی پەیوەست بە فڕۆکەخانەکە دەگرێتەوە.

ئەمەش لەکاتێکدایە، محەمەد شیاع سودانی سەرۆکوەزیرانی عیراق، لە 3ی10ی2025، ناوی فڕۆکەخانەی نێودەوڵەتی سلێمانی بۆ فڕۆکەخانەی نێودەوڵەتی جەلال تاڵەبانی گۆڕی، ئەمەش وەک رێز و پێزانینێک بۆ خەباتی بێوچانی سەرۆک مام جەلال لە رووبەڕووبونەوەی دیکتاتۆرییەتدا.

PUKMEDIA