به‌هه‌وڵی یه‌كێتى فەرمانگەى گومرگ لە باوه‌ مه‌حمود ده‌كرێته‌وه‌

PUKMEDIA

سروە محەمەد

دوای هه‌وڵ و ماندوبونێكی زۆری ئه‌ندامێكی فراكسیۆنی یه‌كێتی له‌ ئه‌نجومه‌نی نوێنه‌رانی عیراق دواجار ئه‌نجومه‌نی وه‌زیرانی عیراق بڕ‌یاریدا به‌ كردنه‌وه‌ی فه‌رمانگه‌ی گومرگ له‌ بازگه‌ی باوه‌مه‌حمود.

سروه‌ محه‌مه‌د ئه‌ندامی فراكسیۆنی یه‌كێتیی نیشتمانیی كوردستان له‌ ئه‌نجومه‌نی نوێنه‌رانی عیراق به‌ PUKMEDIA  راگه‌یاند: دوای هه‌وڵ و ماندوبونێكی زۆر و دوای دروستبوونی گرفت و ئاریشه‌ی قورس بۆ هه‌زاران شۆفێری بارهه‌ڵگری گه‌وره‌ له‌نێوان هه‌رێم و ناوه‌ند، دواجار ره‌زامه‌ندیم وه‌رگرت به‌كردنه‌وه‌ی فه‌رمانگه‌ی گومرگی له‌ بازگه‌ی باوه‌مه‌حمود.
 
ئاشكراشی كرد: ئێمه‌ وه‌ك فراكسیۆنی یه‌كێتی له‌ ئه‌نجومه‌نی نوێنه‌رانی عیراق، دوای هه‌وڵ و ماندوبونی زیاتر له‌ مانگێك و سه‌ردانی وه‌زاره‌تی بازرگانی و نوسینگه‌ی سه‌رۆكی ئه‌نجومه‌نی وه‌زیران محه‌مه‌د شیاع سودانی و به‌ڕ‌ێوه‌به‌رایه‌تی گومركی ناوه‌ند، توانیمان ده‌نگی هه‌زاران شۆفێری بارهه‌ڵگری گه‌وره‌ بگه‌یه‌نین كه‌ زیاتر له‌ ساڵێكه‌ گرفتاری نه‌بوونی گومركن له‌و خاڵه‌ سنوورییه‌.

سروه‌ محه‌مه‌د روونیشی كرده‌وه‌: سه‌ردانی شۆفێره‌كانم كردبوو، به‌ڵێنی چاره‌سه‌ركردنی گرفته‌كه‌م پێدابوون و پێم وتبوون تا كێشه‌ی نه‌بوونی گومرگ و مانه‌وه‌ی شۆفێران له‌و بازگه‌یه‌ چاره‌سه‌ر نه‌كه‌م ناگه‌ڕ‌ێمه‌وه‌.

ئه‌ندامه‌كه‌ی فراكسیۆنی یه‌كێتیی نیشتمانیی كوردستان له‌ ئه‌نجومه‌نی نوێنه‌رانی عیراق، راشیگه‌یاند: دواجار و دوای چه‌ندان سه‌ردان و هه‌وڵ و ماندوبوون توانرا قه‌ناعه‌ت به‌ وه‌زاره‌تی بازرگانی و سه‌رۆكایه‌تی ئه‌نجومه‌نی وه‌زیران بكرێت به‌ كردنه‌وه‌ی بنكه‌یه‌كی گومركی خێرا، بۆ رایی كردنی مامه‌ڵه‌ی شۆفێران و هاووڵاتییان.





 PUKMEDIA