بەئامادەبوونی سەرۆك بافڵ هاوپەیمانی بەڕ‌ێوەبردنی دەوڵەت كۆدەبێتەوە

عیراق 11:26 AM - 2026-02-08

بەئامادەبوونی سەرۆك بافڵ، هاوپەیمانی بەڕ‌ێوەبردنی دەوڵەت بۆ  یەكلاكردنەوەی هەردوو پۆستی سەرۆك كۆمارو سەرۆك وەزیران لەبەغداد كۆدەبێتەوە، سەرۆكی فراكسیۆنی یەكێتیش لەئەنجومەنی نوینەران رایدەگەیەنێت: پێویستە پۆستی سەرۆك كۆمار بۆ یەكێتی بێت، چونكە ئیستحقاقی خۆیەتی.

عەباس مووسەوی، راوێژكاری میدیایی نوری مالیكی رایگەیاند: بڕ‌یارە ئەمڕ‌ۆ یەكشەممە 8ی 2ی 2026، بەئامادەبوونی هەموو لایەنەكان، هاوپەیمانیی بەڕ‌ێوەبردنی دەوڵەت كۆببێتەوەو گفتوگۆ لەبارەی یەكلاكردنەوەی پۆستی سەرۆك كۆمار و سەرۆك وەزیرانی عیراق بكرێت، هاوكات دۆخی ناوخۆی وڵات و پێشهاتەكانی ناوچەكەش دەخرێنە بەر باس.

پێشتریش هەرێم كەمال ئاغا، سەرۆكی فراكسیۆنی یەكێتی، لەئەنجومەنی نوێنەرانی عیراق، بە وێبسایتی رەسمی یەكێتیی نیشتمانیی كوردستان PUKMEDIA ی راگەیاندبوو: پێویستە پۆستی سەرۆك كۆماری عیراق بۆ یەكێتی بێت، چونكە بەگوێرەی رێككەوتن و نەریتە سیاسییەكان ئیستحقاقی خۆیەتی و بەپێی ماددەی دەستووریی پێویستە لەم هەفتەیەدا ئەنجومەنی نوێنەران سەرۆك كۆمار هەڵبژێرێت، بۆئەوەی عیراق نەكەوێتە بۆشایی یاساییەوە.

یەكێتی یەك كاندیدی بۆ پۆستی سەرۆككۆمار هەیە

یەكێتیی نیشتمانیی كوردستان بەگوێرەی رێككەوتن و نەریتە سیاسییەكان ئەو پۆستە وەك رابردوو بە ئیستحقاقی خۆی دەزانێت، بۆ ئەمەش نزار ئامێدی وەك تاكە كاندیدی رەسمیی خۆی بۆ وەرگرتنی پۆستی سەرۆككۆمار پێشكەش بە ئەنجومەنی نوێنەران كردووە.

لەدوای رووخانی رژێمی پێشووی عیراقەوە، بەگوێرەی رێككەوتن و نەریتە سیاسییەكان ئەو پۆستە وەك پشكی یەكێتیی نیشتمانیی كوردستان دیاریكراوە و لەڕ‌ابردووشدا رەوانشاد سەرۆك مام جەلال و د.فواد مەعسوم و د.بەرهەم ئەحمەد ساڵح و د.لەتیف رەشید لەسەر پشكی یەكێتی ئەو پۆستەیان وەرگرتووە، بۆ ئەم خولەش یەكێتیی نیشتمانیی كوردستان نزار ئامێدی وەك تاكە كاندید بۆ ئەو پۆستە دیاریكردووە.

رۆژی 29ی 1ی 2026،  ماوەی دەستووری بۆ هەڵبژاردنی سەرۆك كۆماری عیراق كۆتایی هات و پێویستە لەم هەفتەیەدا سەرۆك كۆمار دیاری بكرێت، چونكە عیراق كەوتووەتە بۆشایی یاساییەوە.

هاوپەیمانیی بەڕ‌ێوەبردنی دەوڵەت لەدوای هەڵبژاردنەكانی تشرینی یەكەمی 2021 و پاش كشانەوەی فراكسیۆنی سەدر لەئەنجومەنی نوێنەرانی عیراق پێكهێنرا، ئەم هاوپەیمانییە لە لایەنە سەرەكییەكانی چوارچێوەی هەماهەنگی (شیعەكان)، هاوپەیمانیی سەروەری (سوننەكان) و هەردوو پارتی سەرەكیی هەرێمی كوردستان، (یەكێتی و پارتی ) پێكدێت، كە ئامانجی سەرەكیی پێكهێنانی ئەم هاوپەیمانییە، كۆتاییهێنان بوو بەو چەقبەستووییە سیاسییەی دوای هەڵبژاردنەكان هاتە ئاراوە و هەروەها پێكهێنانی حكومەتێكی نوێ بوو لە عیراق.

PUKMEDIA