سەندیکاى هونەرمەندان: هونەرمەند سەربەستە کە چۆن پشتگیری خاک و خەڵکەکەی دەکات

راگەیاندنى سەندیکا

لۆگۆى سەندیکاى هونەرمەندان

ئەنجومەنی سەندیکای هونەرمەندانی کوردستان راگەیەنراوێکى بڵاوکردەوە و رایگەیاند: کۆمەڵێک تاقمی توندڕەو و خاوەن بیرکردنەوەی چەقبەستوو، پەلامار و هێرشی ناڕەوا دەکەنە سەر هونەرمەندانی نیشتمانپەروەر، ئێمە بە توندی ئەم هێرشانە سەرکۆنە دەکەین، هونەرمەند سەربەستە لەوەی بە چ شێوازێک پشتگیری لە خاک و خەڵکەکەی دەکات، هاوکات داوا لە هونەرمەندان دەکەین کە رێز لە بەها پیرۆزەکان و داب و نەریتی کۆمەڵگە بگرن .

دەقى راگەیەنراوەکە:

ڕاگەیەندراوێک لە سەندیکای هونەرمەندانی کوردستانەوە
بۆ ڕای گشتی و سەرجەم ناوەندە بڕیاربەدەستەکان

هونەر هەمیشە زمانی زیندووی گەلان بووە و هونەرمەندانیش پێشەنگی ڕاستەقینەی گۆڕانکارییە کۆمەڵایەتی و نەتەوەییەکان بوون، لەم ساتەوەختە هەستیارەدا کە کوردستان لە باشوورەوە تا ڕۆژئاوا لەبەردەم تاقیکردنەوەیەکی مێژووییدایە، هونەرمەندان وەک هەمیشە لە ڕیزی پێشەوەی خەڵک و هاوشانی ئازارەکانی نیشتمان وەستاونەتەوە.

بەداخەوە، لەبری دەستخۆشی و هاوکاری، دەبینین کۆمەڵێک تاقمی توندڕەو و خاوەن بیرکردنەوەی چەقبەستوو، پەلامار و هێرشی ناڕەوا دەکەنە سەر هونەرمەندانی نیشتمانپەروەر، ئێمە لە سەندیکای هونەرمەندانی کوردستان، بە توندی ئەم هێرشانە سەرکۆنە دەکەین و ڕای دەگەیەنین

هونەر تەنیا جوانکاری نییە، بەڵکوو هاواری ئەو کەسانەیە کە بێدەنگ کراون.

 ئەوەی مێژووی کوردستانی لە فەوتان پاراستووە، شمشاڵی شوان و دەنگی ڕەسەنی هونەرمەندان بووە، نەک وتاری توندڕەوی و داخراوی.

هونەرمەند سەربەستە لەوەی بە چ شێوازێک پشتگیری لە خاک و خەڵکەکەی دەکات؛ هیچ کەس و گرووپێک مافی ئەوەی نییە لە ژێر هەر ناوێکدا سنوور بۆ داهێنان و هەڵوێستی ئەوان دابنێت، لەهەمان کاتدا داوا لە هونەرمەندان دەکەین کە رێز لە بەها پیرۆزەکان و داب و نەریتی کۆمەڵگە بگرن و هەلوێستەکانیان ببێتە مایەی یەکڕیزی چینەکانی کۆمەڵگەی کوردەواری.

ئێوە ناتوانن بە زمانی هەڕەشە و ناوزڕاندن، پێش لەو ڕەوتە ڕووناکبیرییە بگرن کە هونەرمەندان ڕابەرایەتی دەکەن، تاریکپەرستی و داخراوی لە مێژووی ئەم گەلەدا جێگەی نابێتەوە، هێرشکردنە سەر هونەرمەند، هێرشکردنە سەر شکۆی نەتەوە و جوانییەکانی ژیانە.

ئێمە وەک ماڵی گەورەی ئێوە، بە هەموو شێوەیەک پشتگیریتان دەکەین، چەکی ئێوە دەنگ و ڕەنگ و وشەیە، کە لە هەر تفەنگ و وتارێکی توندڕەوانە بەهێزترە، بەردەوام بن لە پێشەنگیی و مەهێڵن دەنگە نەشازەکان ساردتان بکەنەوە، هونەر چرایەکە لە تاریکیدا، ئەوانەی لە ڕووناکی دەترسن هەمیشە هەوڵی کوژاندنەوەی دەدەن، بەڵام ئەم چرایە بە هێرشی ناڕەوا ناکوژێتەوە.

ئەنجومەنی سەندیکای هونەرمەندانی کوردستان

PUKMEDIA