فراکسیۆنى یەکێتى: کۆمەڵگەى نێودەوڵەتى هەڵوێستیان بەرامبەر رۆژئاواى کوردستان هەبێت

PUKMEDIA

لۆگۆى یەکێتیى نیشتمانیى کوردستان

فراكسیۆنی یەكێتی لە ئەنجومەنی نوێنەرانی عیراق رایگەیاند: داوا لە كۆمەڵگای نێودەوڵەتی دەكەین، هەڵوێستی بەپەلەیان هەبێت و ئەو خوێنڕێژی و پەلاماردانەی گەلی كورد لە سوریا رابگرن، كۆمەڵگای نێودەوڵەتی و هاوپەیمانێتی نێودەوڵەتی دژی داعش و مرۆڤایەتی لە بەردەم بەرپەرسیاریەتییەكی مرۆیی و مێژوویی و ویژدانیدان، گەلی كوردستان لە رۆژئاوا زیاتر لە (15) هەزار شەهید و دەیان هەزار برینداری  بەخشی تا مەترسی تیرۆریستانی داعش لەناوببات و مرۆڤایەتی لە دڕندەیی ئەو رێكخراوە تیرۆریستییە بپارێزێت‌.

ئەمڕۆ سێشەممە 20ى1ى2026 فراكسیۆنی یەكێتی لە ئەنجومەنی نوێنەرانی عیراق، رایگەیاند: بەنیگەرانیەكی قووڵەوە لە تەشەنەسەندنی ئاڵۆزییەكانی رۆژئاوای كوردستان و سوریا دەروانین، پێمانوایە پەنابردنەبەر شەڕ و توندوتیژی بۆ یەكلایی كردنەوەی پرسە سیاسییەكان و پرسی ڕەوای گەلی كوردستان لە سوریا، هەنگاوێكی مەترسیدارە، كە دەبێتە هۆی نائارامی و دڵەڕاوكێی لە هەموو ناوچەكەدا.

روونیشیکردەوە: حكومەتی كاتیی سوریا لە جیاتی ئەوەی هەوڵبدات هەموو ئەو برین و زامە قووڵانە ساڕێژ بكات، كە بە درێژایی ساڵانی ڕابردوو  رژێمی ئەسەد لە گیانی هەموو پێكهاتەكانی سوریا بەتایبەتی گەلی كورد دروستیكرد و هەنگاو بە ئاراستەی چارەسەری بنەڕەتی كێشەكان بنێت و كار بۆ دەستورێك بكات، كەمافی كورد و پێكهاتەكانی دیکەی سوریا دەستەبەر بكات و سوریای دوای ئەسەد سوریایەكی جیاوازبێت، كەچی پەنا بۆ پەلاماردانی گەلی كوردستان دەبات و دەیەوێت كۆمەڵكوژی ئەنجام بدات.

ئەوەشى خستەڕوو: پەرەسەندنی شەڕ و ئاڵۆزییەکان لە سوریادا، زیانی گەورە لە ئارامی ناوچەکە و ئاشتی و دیموکراتى دەدات و تەنها داعش و گروپە تیرۆریستییەکان لێ سوودمەند دەبن، بەتایبەتی شکاندنی زیندانەکان و بەرەڵابوونی سەدان داعشی مەترسیدار لە داهاتوودا مەترسی گەورە دروستدەکەن و هەلەکە دەقۆزنەوە بۆ خۆڕێکخستنەوە و ئەنجامدانی کردەوەی تیرۆریستی.

ئەوەشى راگەیاند: كۆمەڵگای نێودەوڵەتی و هاوپەیمانێتی نێودەوڵەتی دژی داعش و مرۆڤایەتی لە بەردەم بەرپەرسیاریەتییەكی مرۆیی و مێژوویی و ویژدانیدان، گەلی كوردستان لە رۆژئاوا زیاتر لە (15) هەزار شەهید و دەیان هەزار برینداری  بەخشی تا مەترسی تیرۆریستانی داعش لەناوببات و مرۆڤایەتی لە دڕندەیی ئەو رێكخراوە تیرۆریستییە بپارێزێت‌، وڵاتانی زلهێزی جیهان و رێكخراوە نێودەوڵەتییەكان ئەم ڕاستیەیان زۆرجار سەلماندووە، كەچی ئێستا بێدەنگیەكی ترسناك لە ئاستی پەلاماردانی حكومەتی كاتیی سوریا هەیە، بۆ سەر ئەو پاڵەوانانەی داعشیان تێكشكاند.

فراكسیۆنی یەكێتیلە ئەنجومەنی نوێنەرانی عیراق، ئاماژەى بەوەشدا: داوا لە كۆمەڵگای نێودەوڵەتی دەكەین، هەڵوێستی بەپەلەیان هەبێت و ئەو خوێنڕێژی و پەلاماردانەی گەلی كورد لە سوریا رابگرن، هاوپشتی گەلی كوردستان بكەن، لە بەدیهێنانی مافەكانی لە سوریادا بە رێگاچارەی سیاسی و دەستوریی، نەك كۆمەڵكوژی و قڕكردنی گەلی كورد ، هەروەها داوا لە ئەنجومەنی نوێنەران و حكومەتی عیراق و هەموو لایەنە سیاسییەكان دەكەین، هەڵوێست پیشان بدەن، بۆ ڕاگرتنی كوشتاری گەلی كورد لە سوریا و رێوشوێنی باشتر بگیرێتەبەر بۆ پاراستنی عیراق لە ئەگەری هەر مەترسیەك.

PUKMEDIA