خاتوو شاناز بۆ ئیلهام ئەحمەد: پشتیوانی خەونە مەزنەکانتانم

PUKMEDIA

خاتوو شاناز ئیبراهیم ئەحمەد

بۆ شەهیدبوونی حەوت ئەندامی خانەوادەی ئیلهام ئەحمەد لە هێرش و پەلاماری چەکدارانی سوریا بۆ سەر گەڕەکەکانی ئەشرەفیە و شێخ مەقسود شاناز ئیبراهیم ئەحمەد پەیامێکی ئاڕاستەی خاتوو ئیلهام و ماڵباتەکەی کرد، کە ئەمە دەقەکەیەتی:

خوشکی ئازیز و تێکۆشەرم ئیلهام ئەحمەدی سەربەرز

بە خەم و پەژارەیەکی زۆرەوە هەواڵی شەهیدبوونی حەوت کەسم لە ئەندامانی ماڵباتە تێکۆشەرەکەت بیست، کە لە کۆمەڵکوژییەکەی شێخ مەقسود و ئەشرەفییە گیانی پاکیان بە کورد و مرۆڤایەتی بەخشی.

ئیتر داخ لە سەر داخ و خەم لە دوای خەم و کۆست لە دوای کۆست دیاری و بەرهەمی ئەم رۆژگارە نامۆیەن، کە بۆ نەتەوەکەمان بەڕێوەن. نەتەوەیەک کە باشترین رۆڵەکانی بۆ ئازادی و بەختەوەری مرۆڤ لەم جیهانە ئەکاتە قوربانی کەچی زلهێزەکانیش چاو لەو هەموو نەهامەتی و لەو هەموو خوێنە ئەپۆشن، کە بەدەستی تاریکپەرستان و دوژمنانی روناکی لە جەستەی گەلەکەمان ئەڕژێت.

شەهید بوونی حەوت ئەندامی ماڵباتەکەت تا بڵێی کۆستێکی گەورەیە، هەروەها ئازارێکیشە لە ناخ و رۆحی هەموو نیشتمانپەروەر و ئازادیخوازێکدایە، بەڵام لە سایەی خۆڕاگری ئێوە و گەلە سەربەرزەکەمان، بارتەقای ئەو ئازارە، هیوا و ئومێد بە ئازادی و ژیانێکی سەربەرزانە، لە دڵماندا زیاتر گەشە ئەکات.

جارێکیتر هاوخەمی ئازارەکانتم و پشتیوانی خەونە مەزنەکانتانم. هەر سەرکەوتووبیت

شاناز ئیبراهیم ئەحمەد

PUKMEDIA