پێشێلکاری بەرامبەر ژنانی رۆژنامەنوس لەدۆخێکی مەترسیداردایە

PUKMEDIA

پێشێلکاری بەرامبەر رۆژنامەنوسان

لەگەڵ زیادبونی رێژەی ژنان لەمەیدانی کاری رۆژنامەنوسی، لە 10 مانگی رابردوودا روبەڕووی چەندین پێشێلکاری و برینداربون و دەرکردن بونەتەوەو سەرۆکی رێکخراوی پەیامنێرانیش ئەم دۆخە بە مەترسیدار ناودەبات.

هۆزان قادر، سەرۆکی رێکخراوی پەیامنێران بە PUKMEDIA ی راگەیاند: بەپێی ئامارێک ژنانی رۆژنامەنوس لە ماوەی 10 مانگی پێشوودا پێشێکارییان بەرامبەر کراوەو لەکارەکانیان دەرکراون، کەئەمە دۆخێکی مەترسیدارە رووبەڕوویان دەبێتەوە لەهەرێمی کوردستان.

وتیشی: لەماوەی 10 مانگی سەرەتای ئەمساڵی 2025 دا شەش ژنە رۆژنامەنوس پێشێلکارییان بەرامبەر کراوەو پێنجیشیان بەهۆی گازی فرمێسکڕێژەوە لەمەیدانی کارکردندا برینداربوون.

ئاماژەی بەوەشکرد: 35 ژنە رۆژنامەنوسیش لەکارەکانیان دەرکراون، کە بەشێکیان بە بڕیاری شەخسی لەلایەن بەرێوەبەرەکانیانەوە بووە.

بەپێی ئامارێکی سەندیکای رۆژنامەنوسان، ژمارەی رۆژنامەنوسانی ژن ساڵانە لەزیادبوندایە و لەئێستاشدا زیاتر لە هەزار و 500 ژنە رۆژنامەنوس لەسەرجەم راگەیاندنەکانی بینراو و بیسراو خوێندراو کاردەکەن.

PUKMEDIA