بەهەوڵی قوباد تاڵەبانی زەوی بەسەر مامۆستایانی زانکۆی سلێمانیدا دابەشدەکرێت

فۆتۆ/ سیدرا شەعبان

مەراسیمی تیروپشک بۆ پیدانی زەوی بە مامۆستایانی زانکۆی سلێمانی

تیروپشک بۆ پێدانی زەوی بە زیاتر لە 800 مامۆستای زانکۆی سلێمانی کە هەڵگری بڕوانامەی ماستەر و دکتۆران ئەنجامدەدرێت و پرۆژەکەش بە هاوکاری قوباد تاڵەبانی گەیشتوەتە ئامانج.

د.یۆهان عوسمان به‌ڕێوه‌به‌ری راگه‌یاندنی زانكۆی سلێمانی به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: 833 پارچە زەوی بە تیروپشک بەسەر مامۆستایانی زانکۆی سلێمانیدا دابەشدەکرێت، کەسەرجەمیان هەڵگری بڕوانامەی ماستەر و دکتۆران.

وتیشی: پرۆسەکە بە هاوکاری قوباد تاڵەبانی جێگری سەرۆک وەزیران گەیشتوەتە ئامانج و زەوییەکانیش زەوی زانکۆی سلێمانین و وەک پاداشت بۆ هەوڵ و ماندوبونەکانیان پێیان دەدرێت.

هاوکات د. کۆسار محەمەد سەرۆکی زانکۆی سلێمانی رایگەیاند: زەوییەکان بە روبەری 200 مەتر دەبن و سەرجەم خزمەتگوزارییەکانی جادە و بان و سەوزایی و ئاو و ئاوەڕۆی بۆدابین دەکرێت، هەروەها بەپێی پێویستی شوێنەکەش خوێندنگا و و دایەنگا و مەڵبەندی تەندروستی لەم پرۆژەیەدا دابین دەکرێت.

وتیشی: پێزانینمان بۆ هەوڵە بەردەوامەکانی مامۆستایانی زانکۆکەمان هەیە، کەوێڕای قەیرانەکان و دواکەوتنی مووچەکانیان بەردەوامن لە خزمەت و وایان کردووە زانکۆکەمان لەیەکەمەکاندا بێت، ئەمە بچوکترین خزمەتە کەبەوانی دەکەین و هەوڵدەدەین کاربکەین کە زەوی بۆ فەرمانبەرانی زانکۆش دابین بکرێت.

PUKMEDIA