پێشانگای نێودەوڵەتی کتێب ئەرک و ئامانجی خۆی دەپێکێت

PUKMEDIA

رێکخەر و سەرپەرشتیارانی پێشانگا

حەوتەمین پێشانگای نێودەوڵەتی سلێمانی بۆ کتێب کۆتاییهات و لەکۆنگرەیەکی رۆژنامەوانیدا زانیاری و ئاماری پێشانگاکە خرایەڕوو، رایانگەیاند: 50 هەزار ناونیشانی کتێب لە پێشانگاکەدا هەبوەو زیاتر لە 3500 ناونیشانی نوێ کە بۆیەکەم جار بووە نمایش بکرێت، تێدا نیشاندراوە.

کڕیار و سەردانیکار و میوانێکی زۆر ئامادەبون

کاروان رەسوڵ نوێنەری دامەزراوەی سەرۆک جەلال تاڵەبانی لە کۆنگرەیەکی رۆژنامەوانیدا لە کۆتا رۆژی حەوتەمین پێشانگای نێودەوڵەتی سلێمانی بۆ کتێب رایگەیاند: لەخۆشەویستی سەرۆک مام جەلال بۆ نوسین و کتێب ئەم پێشەنگایە ناونراوە خولی سەرۆک تاڵەبانی، کە دامەزراوەی سەرۆک جەلال تاڵەبانی توانیویەتی هاوکار و بەشدارێکی باش بێت و هەر بابەتێک پەیوەست بە نوسین و کتێب هەبێت دامەزراوەکەمان دەتوانێت هاوکاری بکات".

وتیشی: پێشەنگاکە سەرکەوتوانە بەڕێوەچوو، کڕیار و سەردانیکار و میوانێکی زۆر ئامادەبون، سوپاسی سەرجەم ئەو کەس و لایەنانە دەکەین کە هاوکاربوون.

پێشانگاکە ئەرک و ئامانجی خۆی پێکاوە

دواتر نەوزاد عەبدولعەزیز راوێژکاری وەزارەتی رۆشنبیری و لاوان رایگەیاند: وەزارەت وەک ئەرکی سەرشانی ساڵانە پشتیوانی کردنەوەی پێشانگای کتێب دەکات لە هەولێر و سلێمانی، لەدوو کاتی جیاوازدا بەڕێوەئەچن بۆ ئەوەی ژمارەی سەردانیکاران زیاد بن.

ئەوەشی وت: سوپاسی دامەزراوەی سەرۆک جەلال تاڵەبانی دەکەین کە بە هاوکاری و بەشداریکردنیان لەگەڵمان توانیان رۆحی سەرۆک مام جەلال ئاسودە بکەن، خۆشبەختانە پێشانگاکە ئەرک و ئامانجی خۆی پێکاوە.

پێشانگا لەلایەن بەرپرسانی ئیداری و حکومی و حزبی وڵاتەوە گرنگی پێدراوە

لە کۆتایشدا حاجی حەسەن وەک نوێنەری رێکخەری پێشانگاکە وتی: سوپاسی سەرجەم کەناڵەکانی راگەیاندن دەکەین بۆ بەشداری و روماڵی چالاکیەکان، سوپاسی دامودەزگا ئەمنییەکان دەکەین بۆ پاراستنی ئەمنیەتی پێشانگا، جێی دڵخۆشییە پێشانگای ئەمساڵ لەلایەن بەرپرسانی ئیداری و حکومی و حزبی وڵاتەوە گرنگی پێدراوە.

ئەوەشی راگەیاند: زیاتر لە 50 هەزار ناونیشانی کتێب لەم پێشەنگایەدا هەبوو، کەلە ساڵانی رابردوودا لە 40 بۆ 45 هەزار بووە، هاوکات زیاتر لە 3500 ناونیشانی کتێب بۆ یەکەم جار و لەم پێشەنگایەوە نمایش کراون.

لەبارەی سەردانیکارانیشەوە، وتی: بەهۆی ئەو قەیرانە داراییەی لەئێستادا هەرێمی گرتوەتەوەو ئەو هەموو چالاکیانەی کەلەم کاتەدا لە سلێمانی ئەنجامدراون، رێژەی سەردانیکارانی پێشەنگاکە بەراورد بە ساڵانی رابردوو کەمی کردوەو 50٪ ساڵی رابردوو سەردانیکار و کڕیار هەبووە.

PUKMEDIA