فکری سیاسی جەلال تاڵەبانی لە ماستەرنامەیەکى زانکۆى وڵاتانی عەرەبی لە قاهیرە

PUKMEDIA

سەرۆک جەلال تاڵەبانى

"الفكر السياسي لجلال الطالباني" ناونیشانێكە لە لایەن تویژەر "عمار عباس محمود"ەوە ساڵی 2013 لە زانكۆی "وڵاتانی عەرەبی لە قاهیرە" بۆ بەدەستهێنانی بڕوانامەی ماستەر لە زانستە سیاسییەکاندا لەژێر سەرپەرشتی پرۆفیسۆر "ماجدة علي صالح" پێشكەشكراوە.

ماستەرنامەكە، بە شێوەیەکی زانستی و ورد  باسی لۆژیكی فکری و كارنامەی سیاسی جەلال تاڵەبانی دەکات، لەوانە: (نەتەوەیی و ناسیۆنالیزم، سۆسیالیزم و دیدگای دیموکراتی، لیبرالیزم و پڕۆسەی دیموکراسی، تێڕوانینی لە بارەی یەکێتی خاكی عێراقی و چۆنییەتی تێگەشتن لە كێشەی كورد و ڕێگەچارەكانی) و پێیوایە كە تاڵەبانی وەك کەسایەتییەکی سیاسیی، ئاوێتەی فکری چەند ڕەوتێك بووە، کە پێکەوە شێوەی بیرکردنەوەی سیاسی و ڕێبازی خەبات و نۆرمێكی نوێی بەرخۆدانیان ڕسكاندووە.

لە ناوەڕۆكی ماستەرنامەكەدا هاتووە، كە یەکەم لۆژیكی فکریی تاڵەبانی پەیوەستە بە نەتەوایەتی و ناسیۆنالیزم، دووەم لۆژیكی فکریی تاڵەبانی بریتییە لە سۆسیالیزم و دیموكراتی یان سۆسیال دیموکراسی هاوچەرخ و سێیەم لۆژیكی فکریی تاڵەبانی ڕێچكەی دیموکراسی هاوچەرخە.

لە بواری پراکتیکی سیاسیدا، توێژەر ئاماژە بەوە دەكات، كە تاڵەبانی هەوڵیداوە لە نێوان مافی نەتەوەییەكانی کورد و یەکڕیزی و پاراستنی یەكێتی عیراق هاوسەنگی دروست بکات، پێی وایە کە دەبێت کورد بەشداریی چالاك لە سیستەمی سیاسی عیراقدا بکات و لە هەمان کاتدا مافە نەتەوەییەکانی خۆی بپارێزێت.

لە کۆتاییدا، توێژەر ئەوە دەخاتەڕوو، كە فکریی سیاسی تاڵەبانی تێکەڵەیەکە لە نەتەوایەتی، سۆسیال دیموکراتی و گرتنەبەری رێگەچارەی دیموکراسی بۆ چارەسەركردنی گرفتە بنچینەییەكانی عیراق.

PUKMEDIA